الماتى وبلىسىنىڭ اكىمى مارات سۇلتانعازييەۆتىڭ وكىمىمەن التاي دوسىمبايەۆ ەڭبەكشىقازاق اۋدانىنىڭ اكىمى بولىپ تاعايىندالدى. اۋدان باسشىسىن ءوڭىر اكتيۆىنە تانىستىرۋ بارىسىندا مارات سۇلتانعازييەۆ اكىمدىك الدىندا تۇرعان ءبىرقاتار ماسەلەنى اتاپ ءوتتى، دەپ حابارلايدى Almaty-akshamy.kz.
«التاي ماشىك ۇلىنىڭ مەملەكەتتىك قىزمەتتە تاجىريبەسى مول، ونىڭ ۇستىنە اۋدان تىرشىلىگىمەن ەتەنە تانىس»،- دەگەن مارات ەلەۋسىز ۇلى اۋدان اكىمدىگى نازار اۋدارۋى ءتيىس شارالارعا توقتالدى.
«ەڭبەكشىقازاق اۋدانى - اگرارلىق سالاعا دەن قويعان اۋماق. سوندىقتان، ءبىرىنشى كەزەكتە الداعى جيىن-تەرىم ناۋقانىن دۇرىس وتكىزۋ قاجەت. سونىمەن بىرگە، اۋدانعا ينۆەستور تارتۋ جۇمىسىن جانداندىرۋ كەرەك. الماتى ىرگەسىندە ورنالاسقان ءوڭىردىڭ الەۋەتى تولىق پايدانىلماي كەلەدى»،- دەپ اتاپ ءوتتى ايماق باسشىسى.
التاي ماشىك ۇلى 1962 جىلى 10 اقپاندا الماتى وبلىسى شەلەك اۋدانى قاراتۇرىق اۋىلىندا دۇنيەگە كەلگەن.
ءبىلىمى جوعارى، 1988 جىلى قازاق اۋىلشارۋاشىلىق ينستيتۋتىن ەكونوميست ماماندىعى بويىنشا وقىپ بىتىرگەن.
ەڭبەك جولىن 1979 جىلى الماتى وبلىسى شەلەك اۋدانى قاراتۇرىق سوۆحوزىندا جۇمىسشى بولىپ باستاعان.
1980-1982 جىلدارى سوۆەت ارمياسى قاتارىندا قىزمەت اتقاردى. 1982-1983 جىلدارى الماتى وبلىسى شەلەك اۋدانى ا. ساتتاروۆ اتىنداعى سوۆحوزدا جۇمىسشى.
1988-1992 جىلدارى الماتى وبلىسى شەلەك اۋدانى «اسى» تەمەكى سوۆحوزىندا ەكونوميست، باس ەكونوميست، كاسىپوداق كوميتەتىنىڭ ءتوراعاسى.
1992-1995 جىلدارى الماتى وبلىسى ەڭبەكشىقازاق اۋدانى «الەكسەيەۆسكيي» اسىل تۇقىمدى قۇس سوۆحوزى ديرەكتورىنىڭ ورىنباسارى.
1997-1999 جىلدارى الماتى وبلىسى ەڭبەكشىقازاق اۋدانى «الەكسەيەۆكا» «التىن ديىرمەن» ج ش س اسىل تۇقىمدى قۇس فابريكاسى ديرەكتورىنىڭ ورىنباسارى، ديرەكتورىنىڭ مىندەتىن اتقارۋشى.
1999-2002 جىلدارى الماتى وبلىسى ەڭبەكشىقازاق اۋداندىق ەكونوميكا ءبولىمىنىڭ باستىعى.
2002-2003 جىلدارى الماتى وبلىسى، ەڭبەكشىقازاق اۋدانى «ناسس» ج ش س قارجى سالاسى ديرەكتورى.
2003-2005 جىلدارى «اقجول» ج ش س ديرەكتورىنىڭ ورىنباسارى. 2005-2008 جىلدارى شەلەك سەلولىق وكرۋگىنىڭ اكىمى.
2008 جىلدان قازىرگى ۋاقىتقا دەيىن ەڭبەكشىقازاق اۋدانى اكىمىنىڭ ورىنباسارى قىزمەتىن اتقارىپ كەلدى.