زاۋىتتار شتاتتىق رەجيمدە جۇمىس ىستەپ تۇر
ق ر ەنەرگەتيكا مينيسترلىگى ەلەكتروندىق ساۋدا الاڭدارى ارقىلى سۇيىتىلعان مۇناي گازىن ساۋدالاۋ 2019 جىلى قولعا الىنعانىن ەسكە سالدى. بۇل پروسەسس ءۇش جىل ىشىندە كەزەڭ-كەزەڭىمەن جۇزەگە اسىرىلدى، دەپ حابارلايدى Almaty-akshamy.kz.
ەنەرگەتيكا مينيسترلىگى باسپا ءسوز قىزمەتىنىڭ مالىمەتىنشە، 2022 جىلدىڭ 1 قاڭتارىنان باستاپ تاۋار بيرجالارى ارقىلى تمد ساۋدا-ساتتىق الاڭىنا تولىعىمەن وتتىك.
«ەلەكتروندىق ساۋدا-ساتتىق ارقىلى گاز ساتۋ نارىقتىڭ بارلىق قاتىسۋشىلارى ءۇشىن تەڭ جانە الالامايتىن جاعدايلار تۋدىرىپ، تمد-نىڭ قاجەتتى كولەمدەرىن تىكەلەي وندىرۋشىلەردەن ساتىپ الۋعا مۇمكىندىك بەرەدى»،-دەلىنگەن حابارلامادا.
ۆەدومستۆونىڭ مالىمەتىنشە، 2022 جىلدىڭ قاڭتار ايىندا تاۋار تاسىمالداۋشىلار ماڭعىستاۋ وبلىسى ءۇشىن وندىرۋشىلەردەن 17 406 توننا سۇيىتىلعان مۇناي گازىن ساتىپ العان.
20-24 جەلتوقسان ارالىعىندا ەلەكتروندى ساۋدا الاڭىندا بەس ساۋدا سەسسياسى وتكىزىلدى، ونىڭ بارىسىندا سۇرانىس پەن ۇسىنىس نەگىزىندە سۇيىتىلعان مۇناي گازىنىڭ باعاسى قالىپتاستى.
ماڭعىستاۋ وبلىسىندا قاڭتار ايىندا سۇيىتىلعان گازدى جەتكىزۋدە ءبىر تونناسى ءۇشىن ورتاشا كوتەرمە باعاسى 133 126 تەڭگەنى نەمەسە ءبىر ءليترى 78 تەڭگەنى قۇرادى. بۇل رەتتە اقتاۋ، جاڭاوزەن قالالارىندا، سونداي-اق ماڭعىستاۋ اۋدانىندا بولشەك ساۋدا باعا، ماسەلەن سۇيىتىلعان گازدىڭ ءبىر ءليترى 100-120 تەڭگەنى قۇرادى.
مينيسترلىك قاڭتار ايىنداعى ساۋدا-ساتتىق سەسسيالارى شتاتتىق رەجيمدە وتكەنىن اتاپ ءوتتى. نارىق مەحانيزمى وڭىرلەردىڭ كولەمگە قاجەتتىلىگىن رەتتەدى. ەندى بۇگىندە سۇيىتىلعان گازدىڭ قاجەتتى بۇل كولەمدەرى وڭىرلەر بويىنشا جونەلتىلىپ جاتىر.
2 قاڭتاردا جاڭاوزەن تۇرعىندارىنىڭ سۇيىتىلعان گاز باعاسىنا قاتىستى نارازىلىق بىلدىرگەنى بەلگىلى بولدى.
ماڭعىستاۋ وبلىسىنىڭ ەنەرگەتيكا جانە تكش باسقارماسىنىڭ باسشىسى بەردىبەك قارتبايەۆ بۇگىنگى تاڭدا وڭىردە قاجەتتى گاز كولەمى بار ەكەنىن اتاپ ءوتتى. زاۋىتتار شتاتتىق رەجيمدە جۇمىس ىستەپ تۇر، ال تاۋاردى جەتكىزۋ كەستە بويىنشا جۇزەگە اسىرىلادى.