الماتى وبلىستىق ونكولوگيالىق ديسپانسەرىنىڭ بۇرىنعى ەسەپشىسى بيۋدجەت قاراجاتىن جىمقىرعانى بەلگىلى بولدى

قىلمىستىق ءىس الماتى قالاسى مەدەۋ اۋدانىنىڭ №2 اۋداندىق سوتىندا قارالدى.

سوت ايىپتالۋشىنىڭ 2012 جىلدىڭ قاڭتار ايىنان باستاپ 2015 جىلعا دەيىن كاسىپورىننىڭ ەسەپ ايىرىسۋ شوتىنداعى ەلەكتروندى جۇيەگە قول جەتكىزىپ، باس ەسەپشى قىزمەتىن اتقارا وتىرىپ، ءۇشىنشى تۇلعالاردىڭ شوتتارىنان بيۋدجەت قاراجاتىن نەگىزسىز اۋدارىپ، كەيىن ول اقشانى قولما-قول اقشاعا اينالدىرىپ كەلگەنىن انىقتادى، دەپ حابارلايدى Almaty-akshamy.kz قازاقپاراتقا سىلتەمە جاساپ.

«الماتى وبلىستىق ونكولوگيالىق ديسپانسەرى» شجق مكقك-عا 53 ملن تەڭگەدەن استام شىعىن كەلتىرىلگەن. سوتقا دەيىنگى تەرگەپ-تەكسەرۋ بارىسىندا سوتتالۋشى م.-نىڭ ۇرلانعان اقشاعا جەر تەلىمىن الىپ، ول جەرگە تۇرعىن ءۇي سالىپ، قىمبات كولىكتەر ساتىپ العانى انىقتالدى.

سوتتالۋشى ءوز كىناسىن تولىق مويىنداپ، ىستەگەن ىسىنە وكىنەتىندىگىن ايتتى. پروكۋرور تاعىلعان ايىپتار بويىنشا ونى كىنالى دەپ تانىپ، مۇلكىن تاركىلەپ، 7 جىلعا باس بوستاندىعىنان ايىرۋدى سۇرادى.

سوت ايىپتالۋشىنىڭ ءوز كىناسىن تولىق مويىنداعانىن ءارى بالالارى بارىن ەسكەرىپ، جازاسىن جەڭىلدەتتى.

«سوت ۇكىمىمەن م. قىلمىستىق كودەكستىڭ 189-بابى 4-بولىگى 2-تارماعىندا كوزدەلگەن قىلمىستى جاساعانى ءۇشىن كىنالى دەپ تانىلىپ، وعان قىلمىستىق جولمەن تابىلعان مۇلكى تاركىلەنىپ، بۋحگالتەرلىك قىزمەتپەن اينالىسۋ قۇقىعىنان 5 جىلعا شەتتەتىلىپ، 7 جىل باس بوستاندىعىنان ايىرۋ جازاسى تاعايىندالدى. ۇكىم زاڭدى كۇشىنە ەنگەن جوق»، - دەپ حابارلادى الماتى قالاسى مەدەۋ اۋدانى №2 اۋداندىق سوتىنىڭ باسپا ءسوز قىزمەتىنەن.