ءبىلىم بەرۋدەگى يننوۆاسيالىق تەحنولوگيالاردىڭ ماڭىزى الماتىدا وتكەن عىلىمي كونفەرەنسيادا تالقىلاندى.
وعان ەلىمىزدىڭ ءار وڭىرىنەن 150-دەن اسا ۇستاز قاتىستى، دەپ حابارلايدى Almaty-akshamy.kz.
وقۋ-اعارتۋ مينيسترلىگىنىڭ وكىلدەرى، جوعارى وقۋ ورىندارىنىڭ پروفەسسورلارى مەن عىلىمي زەرتتەۋ ينستيتۋتتارىنىڭ قىزمەتكەرلەرى ءوز ويىن ورتاعا سالدى. ال شوتلانديا، امەريكا جانە اۆستراليا عالىمدارى ءوز تاجىريبەسىمەن ونلاين فورماتتا ءبولىستى. ولار ەلىندەگى يننوۆاسيالىق تەحنولوگيالاردىڭ مۇمكىندىكتەرى مەن كەمشىلىكتەرىن ايتىپ بەردى. جيىننىڭ قورىتىندىسى بويىنشا ارنايى عىلىمي جيناق توپتاستىرىلىپ، كىتاپحانالارعا تاراتىلادى. شارانىڭ نەگىزگى ماقساتى - وقىتۋشىلاردى جاڭا وقۋ جىلىنا دايارلاۋ، كاسىبي شەبەرلىكتەرىن شىڭداۋ.
«قولدانبالى عىلىمي-زەرتتەۋ ادىستەرىن مەكتەپ مۇعالىمدەرىنىڭ اراسىندا كەڭىنەن تاراتۋ. سول ارقىلى وقۋشىلارىمىزدىڭ عىلىمعا دەگەن قىزىعۋشىلىعىن ارتتىرۋ. حالىقارالىق وليمپيادالاردا ۇلكەن جۇلدەگە دەگەن، عىلىمي ىزدەنىسكە دەگەن مۇمكىندىكتەرىنە قوسىمشا كەڭەس بەرۋ»، - دەيدى PHD دوكتور نۇربولات نىشانبايەۆ.