كەلەسى جىلدان باستاپ ءۇش اۋىسىمدى مەكتەپتەردەن باسقا مەكتەپتىڭ ءبارىن بەس كۇندىك وقۋ فورماتىنا كوشىرۋ تۋرالى شەشىم قابىلداندى.
بۇل تۋرالى وقۋ-اعارتۋ ءمينيسترى اسحات ايماعامبەتوۆ رەسپۋبليكالىق تامىز كونفەرەنسياسىندا ايتتى، دەپ حابارلايدى Almaty-akshamy.kz Elorda.info-عا سىلتەمە جاساپ.
«بۇل مەكتەپ ديرەكتورلارىنا، ۇستازدارعا، مەكتەپتىڭ بارلىق قىزمەتكەرلەرىنە قاتىستى. ءبىزدىڭ ويىمىزشا، سەنبى كۇنى ۇستازدار دەمالۋى كەرەك، بالالارىمەن بىرگە بولۋى كەرەك. «بۇل ەڭبەك دەمالىسىنىڭ اقىسىنا اسەر ەتە مە؟» دەگەن ساۋال تۋىنداۋى زاڭدى. بۇل ەڭبەك دەمالىسىنىڭ اقىسىنا اسەر ەتپەيتىن بولادى»، – دەپ مالىمدەدى مينيستر.
ايتا كەتەيىك، بۇل قاتارعا ءۇش اۋىسىمدى مەكتەپتەر كىرمەيدى. ال ەڭبەك دەمالىسى 56 كۇن بولىپ وزگەرىسسىز قالادى.