بۇل تۋرالى سىبايلاس جەمقورلىققا قارسى ءىس-قيمىل اگەنتتىگى ءتوراعاسىنىڭ ءبىرىنشى ورىنباسارى دميتريي مالاحوۆ ايتتى.
سوتتالۋشىلارعا 35 ملن تەڭگەدەن اسا پارا الدى دەگەن ايىپ تاعىلعان، دەپ حابارلايدى Almaty-akshamy.kz
«الماتى وبلىستىق ءبىلىم باسقارماسىنىڭ بۇرىنعى باسشىسى مايگۇل وماروۆا 10 جىلعا، وڭىرلىك اقپاراتتىق تەحنولوگيالار ورتالىعىنىڭ باسشىسى اراپبي مەڭلىبايەۆ 11 جىلعا، ءبىلىم باسقارماسىنىڭ باس مامانى باقىت ابدولدانوۆا 10 جىلعا باس بوستاندىعىنان ايىرىلدى. ولار مەملەكەتتىك ساتىپ الۋعا قاتىستى كەلىسىمشارتقا پارا الدى دەپ ايىپتالعان»، - دەدى مالاحوۆ تالدىقورعانداعى جيىندا.
ەسكە سالايىق، مايگۇل وماروۆا 2021 جىلدىڭ 9 اقپانىندا ۇستالعان. تەرگەۋ ماتەريالدارىنا سايكەس، ول 2020 جىلدىڭ قازان-قاراشا ايلارىندا جالپى سوماسى 406 ميلليون تەڭگەگە 2522 نوۋتبۋك جەتكىزۋگە جانە پاندەميامەن كۇرەس بويىنشا داعدارىسقا قارسى شارالار شەڭبەرىندە ساتىپ الىنعان نوۋتبۋكتەردى كەدەرگىسىز قابىلداۋعا مەملەكەتتىك ساتىپ الۋ شارتىن جاساعان.