مۋزەي سالاسىن دامىتۋ جانە حالىقارالىق ستاندارت ەنگىزۋ اياسىندا الماتى قالاسى مۋزەيلەرى بىرلەستىگىنىڭ قىزمەتكەرلەرى كورەيا رەسپۋبليكاسىنىڭ سەۋل جانە كوندجۋ قالالارىنىڭ جەتەكشى مۋزەيلەرىندە كاسىبي بىلىكتىلىگىن ارتتىرۋدان ءوتتى، - دەپ حابارلايدى Aqshamnews.kz.
بۇل تۋرالى الماتى قالاسى مادەنيەت باسقارماسىنىڭ وكىلدەرى حابارلادى.
بىلىكتىلىكتى ارتتىرۋ باعدارلاماسى سەۋل قالاسى مۋزەيلەرى بىرلەستىگى تاراپىنان تەگىن نەگىزدە جۇزەگە اسىرىلىپ، مادەنيەت پەن مۋزەي ءىسى سالاسىنداعى حالىقارالىق ىنتىماقتاستىقتى نىعايتۋ باعىتىنداعى جۇيەلى جۇمىستىڭ ناتيجەسى بولدى.
وقۋ باعدارلاماسى زاماناۋي مۋزەي قىزمەتىنىڭ نەگىزگى باعىتتارى، اتاپ ايتقاندا، ەكسپوناتتاردى ەسەپكە الۋ جانە ساقتالۋىن قامتاماسىز ەتۋ، ونىڭ ىشىندە قولايلى كليماتتىق جاعدايدى (تەمپەراتۋرا، ىلعالدىلىق، جارىق) باقىلاپ، رەتتەۋ، رەستاۆراسيا جانە كونسەرۆاسيا جۇمىستارىن جۇرگىزۋ، تاسىمالداۋ كەزىندە قاۋىپسىزدىك تالاپتارىن ساقتالۋىن قاداعالاۋ بويىنشا تەوريالىق جانە تاجىريبەلىك ساباقتاردى قامتىدى.
تاعىلىمداما اياسىندا مۋزەي قىزمەتكەرلەرى سەۋل جانە كەندجۋ قالالارىنىڭ جەتەكشى مۋزەيلەرىنىڭ جۇمىس تاجىريبەسىمەن جان-جاقتى تانىستى. اتاپ ايتقاندا، كورەيانىڭ ۇلتتىق مۋزەيى، كورەيا ۇلتتىق فولكلور مۋزەيى، سەۋل قالاسى تاريحى مۋزەيى، سەۋل قولونەر ونەر مۋزەيى، سەدجون پاتشا مۋزەيى، ادميرال لي سۋنسين مۋزەيى، كورەيانىڭ ۇلتتىق ساراي مۋزەيى، كەندجۋ ۇلتتىق مۋزەيى، كەندجۋ ۇلتتىق پاركى، كەنبوككۋن سارايى، چحونگەچحون مۋزەيى، حانياندوسون بەكىنىس-قامالى مۋزەيى.
سونىمەن قاتار، يۋنەسكو-نىڭ الەمدىك مۇرالار تىزىمىنە ەنگەن اشىق اسپان استىنداعى كەندجۋ ارحەولوگيالىق كەشەنىنىڭ قىزمەتىمەن تانىسىپ، وزىق تاجىريبەلەرىن زەردەلەدى.
ايتا كەتەيىك، 2022 جىلى الماتى قالاسى مۋزەيلەر بىرلەستىگى مەن سەۋل قالاسى تاريحى مۋزەيى اراسىندا ىنتىماقتاستىق تۋرالى مەموراندۋمعا قول قويىلعان بولاتىن. وسى كەلىسىم اياسىندا 2022 جىلى سەۋل قالاسى تاريحى مۋزەيىندە الماتى مۋزەيىنىڭ «ۇلى دالا جاۋھارلارى» كورمەسى، ال 2024 جىلى الماتى قالاسىندا سەۋل قالاسى تاريحى مۋزەيىنىڭ «سەۋل عاجايىپتارى» كورمەسى ۇيىمداستىرىلدى.