قازاقستان حالقىنىڭ تىلدەرى كۇنىنە وراي 2 قىركۇيەكتە تۇركىستان قالاسىندا ەرەكشە مازمۇنداعى بايقاۋ ءوتتى. عىلىم جانە جوعارى ءبىلىم مينيسترلىگىنىڭ ءتىل ساياساتى كوميتەتى ۇيىمداستىرعان رەسپۋبليكالىق «ءتىل شەبەرى – 2025» بايقاۋى بيىل دا ەل ىشىندەگى ۇزدىك ءتىل مەڭگەرگەن مەملەكەتتىك قىزمەتشىلەردى انىقتادى.
ءۇش ءتىلدى ەركىن مەڭگەرگەن قىزمەتكەرلەر اراسىنداعى بۇل بايقاۋعا ەلىمىزدىڭ ءار وڭىرىنەن ىرىكتەلىپ الىنعان 15 قاتىسۋشى جينالدى. ولار قازاق، ورىس جانە اعىلشىن تىلدەرىندەگى بىلىم-بىلىك دەڭگەيلەرىن جان-جاقتى كورسەتىپ، ءوزارا ب ا ق سىناستى.
بايقاۋ ءۇش كەزەڭنەن تۇردى. العاشقى كەزەڭدە ۇمىتكەرلەر قازاق تىلىندەگى سيرەك قولدانىلاتىن سوزدەردىڭ ماعىناسىن اشىپ، باي تىلدىك قورلارىن تانىتتى. ەكىنشى كەزەڭدە ورىس تىلىندە ەلىمىزدىڭ گەوگرافياسى مەن ۇلتتىق قۇندىلىقتارى جايلى سۇراقتارعا جاۋاپ بەرسە، سوڭعى كەزەڭدە اعىلشىن تىلىندە قازاقستاننىڭ تانىمال تۇلعالارى مەن سالت-داستۇرلەرى تۋرالى ءوز كوزقاراستارىن ورتاعا سالدى.
ءتىل ماماندارى مەن ءارتۇرلى سالانىڭ كاسىبي ساراپشىلارىنان قۇرالعان ءادىلقازىلار القاسى قاتىسۋشىلاردىڭ تىلدىك قۇزىرەتىن، سويلەۋ مادەنيەتىن، وي جۇيەلەۋ قابىلەتىن جانە شەشەندىك شەبەرلىگىن باعالادى.
ناتيجەسىندە، بايقاۋدىڭ باس جۇلدەسىن الماتى قالاسى اكىمى اپپاراتى تىلدەردى دامىتۋ جانە ونوماستيكا ءبولىمىنىڭ باس ينسپەكتورى نۇرعازى ارداق ءادىلعازى قىزى جەڭىپ الدى.
ەكىنشى ورىن قىزىلوردا وبلىسى ءدىن ىستەرى باسقارماسىنىڭ ءبولىم باسشىسى بەردىبەك نۇرحاتقا بۇيىردى. ال ءۇشىنشى ورىندى قوستاناي وبلىسى تەكسەرۋ كوميسسياسىنىڭ باس ينسپەكتورى جاقسان راۋان مەن ورال قالاسى زاچاگان كەنتى اكىمى اپپاراتىنىڭ باس مامانى مۇحانبەتقالييەۆ داۋلەتجان ءبولىستى.
بۇل بايقاۋ – مەملەكەتتىك ءتىلدىڭ مارتەبەسىن ارتتىرۋمەن قاتار، كوپتىلدىلىك مادەنيەتىن دامىتۋعا باعىتتالعان يگى باستاما. سونىمەن بىرگە، ءتۇرلى سالادا ەڭبەك ەتىپ جۇرگەن مەملەكەتتىك قىزمەتشىلەردىڭ جان-جاقتى ءبىلىمدى، تىلگە دەگەن سۇيىسپەنشىلىگى بار ەكەنىن ايقىندادى.
ءتىل – ۇلتتىڭ جانى. ال ونى قادىرلەي بىلگەن ازامات – ەلدىڭ شىن جاناشىرى. وسىنداي بايقاۋلاردىڭ باستى ماقساتى دا – تىلگە دەگەن قۇرمەتتى ارتتىرىپ، كوپتىلدى ازاماتتىق قوعامنىڭ قالىپتاسۋىنا ۇلەس قوسۋ.