قۇرىلعىلار كۇتۋ رەجيمىندە جۇمىس ىستەيدى.
الماتى مەتروسىنداعى العاشقى سەيسميكالىق ستانسيالار ماۋسىم ايىندا تولىعىمەن پايدالانىسقا بەرىلەدى، دەپ حابارلايدى Almaty-akshamy.kz.
«ينجەنەرلىك-سەيسمومەتريكالىق قىزمەت ستانسيالارىن ورناتۋعا «قازاق قۇرىلىس جانە ساۋلەت عىلىمي-زەرتتەۋ جانە جوبالاۋ ينستيتۋتى» اق (قازقسعزي) عىلىمي-تەحنيكالىق تۇرعىدان كومەك كورسەتتى»،- دەلىنگەن يندۋستريا جانە ينفراقۇرىلىمدىق دامۋ مينيسترلىگىنىڭ باسپا ءسوز قىزمەتىنىڭ حابارلاماسىندا.
الماتى قالاسى مەتروپوليتەنىنىڭ «باۋىرجان مومىش ۇلى» جانە «سارى ارقا» جاڭا ستانسيالارىندا توعىز ارنالى سيفرلى اسپاپتى-ولشەۋ جۇيەلەرى ورناتىلدى. اتالعان قۇرىلعىلار شۆەيساريالىق «GeoSIG» فيرماسىنىڭ ءونىمى.
بۇل – الماتى قالاسىنىڭ مەترو جۇيەسىندە ورناتىلعان العاشقى سەيسميكالىق ستانسيا. اتالعان قۇرىلعىلار جەر سىلكىنىسىن الدىن-الا بولجاۋعا مۇمكىندىك بەرىپ، ءزىلزالا كەزىندەگى كينەماتيكالىق پارامەترلەردىڭ اسپاپتىق جازبالارىن الۋعا سەپتىگىن تيگىزبەك. قۇرىلعىدان الىنعان اقپارات سەيسميكالىق اسەردىڭ ناقتى قۋاتى مەن ەرەكشەلىكتەرىن ەسكەرۋگە جانە مەتروپوليتەننىڭ جاڭا ستانسيالارىن جوبالاۋعا ىقپال ەتەدى.
قۇرىلعىلار كۇتۋ رەجيمىندە جۇمىس ىستەيدى. ونىڭ ىسكە قوسۋ شەگى – 0.05g. اسپاپتا ىسكە قوسۋ شەگىنىڭ بولۋى – مەتروپوليتەندەگى پويىزدار قوزعالىسىنىڭ ديناميكالىق اسەرىمەن بايلانىستى.
ستانسيالار وتكەن جىلى تەحنيكالىق تۇرعىدان ىسكە قوسىلدى. بيىلعى جىلدىڭ ماۋسىم ايىندا ولاردى تولىعىمەن پايدالانۋ جوسپارلانىپ وتىر. الداعى ۋاقىتتا مەتروپوليتەندەگى قۇرىلىسى ءجۇرىپ جاتقان تاعى ەكى بەكەتتە وسى تاقىلەتتەس سەيسميكالىق ستانسيالاردى ورناتۋ كوزدەلگەن.