الماتى اكىمى دارحان ساتىبالدى ۇلىبريتانيا جانە سولتۇستىك يرلانديا بىرىككەن كورولدىگىنىڭ قازاقستان رەسپۋبليكاسىنداعى توتەنشە جانە وكىلەتتى ەلشىسى ساللي دجەين اكسۋورسيمەن كەزدەستى. كەزدەسۋ بارىسىندا تاراپتار ساۋدا-ەكونوميكالىق، ءبىلىم بەرۋ، تۋريستىك جانە گۋمانيتارلىق سالالارداعى ارىپتەستىكتى كەڭەيتۋ جايىن تالقىلادى.
دارحان ساتىبالدى بيىل قازاقستان مەن ۇلىبريتانيا اراسىنداعى ديپلوماتيالىق قاتىناستاردىڭ ورناعانىنا 33 جىل تولعانىن اتاپ ءوتتى.
«وسى جىلدار ىشىندە ءبىزدىڭ مەملەكەتتەرىمىز كەڭ اۋقىمدى باعىتتار بويىنشا بەرىك دوستىق جانە ارىپتەستىك بايلانىستار ورناتتى. الماتى ەلىمىزدىڭ ءىرى ىسكەرلىك جانە مادەني ورتالىعى رەتىندە ءوزارا ءتيىمدى ىنتىماقتاستىقتى ودان ءارى دامىتۋعا مۇددەلى»، - دەپ اتاپ ءوتتى قالا اكىمى.
بيىل قاڭتار–شىلدە ايلارىندا الماتى مەن ۇلىبريتانيا اراسىنداعى تاۋار اينالىمى 125،5 ملن اقش دوللارىنا جەتتى. الماتىعا كەلگەن تۋريستەر سانى 2025 جىلدىڭ ءبىرىنشى جارتىجىلدىعىندا 1،1 ملن ادام بولدى، بۇل بىلتىرعى جارتىجىلدىقپەن سالىستىرعاندا 6،5% - عا وسكەن.
گۋمانيتارلىق ءوزارا ءىس-قيمىل تۋرالى ايتا كەلە، دارحان ساتىبالدى ءبىلىم بەرۋ سالاسىنداعى ىنتىماقتاستىقتىڭ ماڭىزدىلىعىن اتاپ ءوتتى.
«ۇلىبريتانيا ءبىلىم بەرۋ سالاسىنداعى ماڭىزدى سەرىكتەس بولىپ قالا بەرەدى. بۇگىندە 300-گە جۋىق قازاقستاندىق ستۋدەنت بريتان ۋنيۆەرسيتەتتەرىندە «بولاشاق» باعدارلاماسى بويىنشا ءبىلىم الۋدا، الماتىدا British Council كەڭسەسى تابىستى جۇمىس ىستەۋدە. 20 جىلدان استام ۋاقىت بويى قازاقستان-بريتان تەحنيكالىق ۋنيۆەرسيتەتى جۇمىس ىستەپ كەلەدى، ال 2021 جىلى de Montfort ءبىرىنشى تولىق بريتاندىق ۋنيۆەرسيتەتى اشىلدى»، - دەپ اتاپ ءوتتى اكىم.
كەزدەسۋ سوڭىندا تاراپتار ەكونوميكالىق جانە مادەني بايلانىستاردى نىعايتۋ، سونداي-اق الماتى مەن بىرىككەن كورولدىك اراسىنداعى سەرىكتەستىكتىڭ جاڭا فورماتتارىن ىلگەرىلەتۋ بويىنشا بىرلەسكەن جۇمىستى جالعاستىرۋعا دايىن ەكەندىكتەرىن ايتتى.