الماتىدا بيبىگۇل تولەگەنوۆانىڭ XIII حالىقارالىق ۆوكاليستەر بايقاۋىنىڭ سالتاناتتى اشىلۋ ءراسىمى ءوتتى. الماتى قالاسىنىڭ اكىمدىگىنىڭ قولداۋىمەن ءوتىپ جاتقان حالىقارالىق بايقاۋعا بيىل 52 ورىنداۋشى قاتىسىپ جاتىر.
ب ا ق سىناۋعا وتاندىق وپەرا انشىلەرىمەن قاتار ارمەنيا، رەسەي، وزبەكستان، قىرعىزستان، موڭعوليا، سونداي-اق يتاليادا ەڭبەك ەتىپ جۇرگەن قازاقستان مەن ۋكراينانىڭ جاس تالانتتارى دا كەلدى.
قازىلار القاسىنىڭ ءتورايىمى – كسرو جانە قازاقستاننىڭ حالىق ءارتىسى، سوسياليستىك ەڭبەك ەرى، كسرو مەن قازاقستاننىڭ مەملەكەتتىك سىيلىقتارىنىڭ لاۋرەاتى، اكادەميك بيبىگۇل احمەت قىزى تولەگەنوۆا قاتىسۋشىلارعا جىلى لەبىزىن ءبىلدىرىپ، ساتتىلىك تىلەدى.
سالتاناتتى شاراعا قازاقستاننىڭ حالىق ءارتىسى ديماش قۇدايبەرگەن دە قاتىستى. ول بيبىگۇل تولەگەنوۆانىڭ شىعارماشىلىعىنا ەرەكشە ءتانتى ەكەنىن جەتكىزىپ، ءوزىنىڭ شىعارماشىلىق جولىنداعى جەتىستىكتەرىنە ۇستازدىق پەن اقىل-كەڭەستەرىنىڭ زور ىقپال ەتكەنىن اتاپ ءوتتى. ءانشى كونكۋرسانتتارعا شابىت تىلەدى.
ساحنا تورىندە بايقاۋدىڭ بۇرىنعى جەڭىمپازدارى دا ونەر كورسەتتى. ولار اتاقتى وپەرالىق شىعارمالاردى ورىنداپ، كورەرمەندەرگە بەكزاتتىق ونەردىڭ اسەرلى اتموسفەراسىن سىيلادى.
بايقاۋ تۋرالى اقپارات:
بايقاۋ ىرىكتەۋ جانە فينالدىق كەزەڭنەن تۇرادى. بارلىق تىڭدالىمدار قازىلار القاسى مەن كورەرمەن الدىندا وتەدى. فينالعا 12–14 قاتىسۋشى جولداما الادى.
جەڭىمپازداردى بەدەلدى اتاق، قوماقتى اقشالاي سىيلىقتار، سونداي-اق كلاسسيكالىق، حالىق جانە قازاقستاندىق شىعارمالاردى ۇزدىك ورىنداعانى ءۇشىن ارنايى جۇلدەلەر كۇتەدى.
قاتىسۋشىلاردىڭ ونەرىن ۆوكالدىق ونەردىڭ تانىمال شەبەرلەرى كىرەتىن حالىقارالىق قازىلار القاسى باعالايدى.
بيبىگۇل تولەگەنوۆانىڭ حالىقارالىق ۆوكاليستەر بايقاۋى ونەر الەمىندە كوپتەگەن جاڭا ەسىمدەردى تانىتتى جانە جاس تالانتتار ءۇشىن ماڭىزدى باستاۋ الاڭىنا اينالدى. ونىڭ باستى ماقساتى – جاڭا بۋىندى ادامگەرشىلىك پەن رۋحاني سۇلۋلىقتا تاربيەلەۋ، سونداي-اق كلاسسيكالىق حالىق مۋزىكالىق مۇراسىن ساقتاۋ جانە ناسيحاتتاۋ. بۇگىندە بايقاۋ لاۋرەاتتارى الەمنىڭ جەتەكشى وپەرا ساحنالارىندا تابىستى ونەر كورسەتىپ، قازاقستاندى لايىقتى دارەجەدە تانىتۋدا. سونىمەن قاتار بايقاۋدىڭ گەوگرافياسى جىل سايىن كەڭەيىپ كەلەدى.
ەستەرىڭىزگە سالا كەتەيىك، بيبىگۇل تولەگەنوۆانىڭ حالىقارالىق ۆوكاليستەر بايقاۋى 2001 جىلدان بەرى ءداستۇرلى تۇردە ەكى جىل سايىن وتكىزىلىپ كەلەدى. كەلەسى جىلى بايقاۋعا 25 جىل تولادى.
قاتىسۋشىلارعا قولداۋ كورسەتۋ ءۇشىن ىرىكتەۋ كەزەڭىنىڭ كۇندەرى – 26-28 قىركۇيەك ارالىعىندا ساعات 11:00-دەن 19:00-گە دەيىن قۇرمانعازى اتىنداعى قازاق ۇلتتىق كونسەرۆاتورياسىنىڭ ۇلكەن كونسەرت زالىنا كەلۋگە بولادى.
فينالدىق تۋر 30 قىركۇيەكتە جامبىل اتىنداعى قازاق مەملەكەتتىك فيلارمونياسىنىڭ ۇلكەن زالىندا وتەدى.