مادەنيەت جانە سپورت ءمينيسترى داۋرەن ابايەۆ جوسپارلاۋدان باستاپ ەسكەرتكىشتەردى ورناتقانعا دەيىنگى جۇمىسقا مۇقيات قاراۋ وتە ماڭىزدى ەكەنىن ايتتى.
الماتى قالاسىندا احمەت بايتۇرسىنۇلىنا ەسكەرتكىش جانە جۇمات شانينگە بيۋست ورناتىلادى، دەپ حابارلايدى Almaty-akshamy.kz وكق-نە سىلتەمە جاساپ.
قوستاناي وبلىسىنىڭ تورعاي اۋىلىندا احمەت بايتۇرسىن ۇلى مەن ءمىرجاقىپ دۋلاتۇلىنا ەسكەرتكىش تۇرعىزىلادى، سونداي-اق الماتى قالاسىندا احمەت بايتۇرسىنۇلىنا ەسكەرتكىش جانە جۇمات شانينگە بيۋست ورناتىلادى. قۇرامىنا بەلگىلى مۇسىنشىلەر، سۋرەتشىلەر، زەرگەرلەر، عالىمدار مەن قوعام قايراتكەرلەرى كىرەتىن مونۋمەنتتىك ونەر قۇرىلىستارىن ورناتۋ جونىندەگى كوميسسيا رەسپۋبليكالىق كونكۋرستىڭ قورىتىندىسى بويىنشا جوبالاۋ جۇمىستارىن قاراپ، ماقۇلدادى.
«ەسكەرتكىشتەر – تاريحي جادىمىزدى جاڭعىرتۋدا جانە قوعامدىق سانانى قالىپتاستىرۋدا ەرەكشە مانگە يە. سوندىقتان جوسپارلاۋدان باستاپ ەسكەرتكىشتەردى ورناتقانعا دەيىنگى جۇمىسقا مۇقيات قاراۋ وتە ماڭىزدى. كوميسسيا توبى مۇسىندەردىڭ جۇمساق ماتەريالدان جاسالعان تولىق كولەمدەگى نۇسقاسىن جان-جاقتى قاراستىرۋى قاجەت»، – دەدى مادەنيەت جانە سپورت ءمينيسترى داۋرەن ابايەۆ.
سونداي-اق، كوميسسيا مۇشەلەرى جامبىل، قاراعاندى، قوستاناي، تۇركىستان جانە ۇلىتاۋ وبلىستارى اكىمدىكتەرىنىڭ يدەيالىق ۇسىنىستارىن ءبىراۋىزدان قولدادى. اتالعان وڭىرلەردە قازاقستاننىڭ حالىق جازۋشىسى شەرحان مۇرتازاعا، اقىن، مەملەكەت جانە قوعام قايراتكەرى كاكىمبەك سالىقوۆقا، نياز باتىر سايدالى بارقىۇلىنا، ءىى دۇنيەجۇزىلىك سوعىس جانە ەڭبەك ارداگەرى جاقسىبەك وڭشىبايەۆقا جانە تۇرىك ساياساتكەرى، مەملەكەت قايراتكەرى ادنان مەندەرسكە ارنالعان ەسكەرتكىشتەردى جوبالاۋ جوسپارلانعان.
كوميسسيا مۇشەلەرى سارتاي بايجانۇلىنا ارنالعان «سارتاي باتىر – مىڭ بالا» ەسكەرتكىشىنىڭ جوبالىق جۇمىسىن قابىلدامادى، جوبا قايتا پىسىقتاۋدى قاجەت ەتەدى. سونداي-اق، جيىندا ساراپشىلار مونۋمەنتالدى ونەر سالاسىنداعى وزەكتى ماسەلەلەردى دە تالقىلادى.