الماتى مەن قىتايدىڭ ءىرى قالالارى اراسىنداعى اۋە قاتىناسىن كەڭەيتۋ، سونداي-اق تۋريستىك جانە ىسكەرلىك بايلانىستاردى نىعايتۋ ماسەلەسى الماتى اكىمى ەربولات دوسايەۆ پەن Air China Limited اۋە كومپانياسىنىڭ ءتوراعاسى، China National Aviation Holding Company پرەزيدەنتى ما چونسيان مىرزامەن كەزدەسۋ بارىسىندا تالقىلاندى.
بۇل ءىس-شارا الماتى اكىمى ەربولات دوسايەۆتىڭ جۇڭگو حالىق رەسپۋبليكاسىنا جاساعان جۇمىس ساپارى اياسىندا بەيجىڭدە ءوتتى، دەپ حابارلايدى aqshamnews.kz.
كەزدەسۋدىڭ نەگىزگى ناتيجەسى – الماتى اكىمدىگى مەن قىتايدىڭ ۇلتتىق اۋە تاسىمالداۋشىسى Air China اراسىنداعى رەيستەردى اشۋعا جاردەمدەسۋ جونىندەگى مەموراندۋمعا قول قويۋى بولدى.
تاراپتار ەكى ەل اراسىنداعى ەكونوميكالىق ءوسىم مەن مادەني الماسۋدىڭ ماڭىزدىلىعىن اتاپ، جولاۋشىلار لەگىن ارتتىرۋ ءارى قازاقستان مەن جۇڭگو تۋريستەرىنە لوگيستيكانى جەڭىلدەتۋ ماقساتىندا «الماتى-بەيجىڭ» قوسىمشا رەيسىن جانە «الماتى-چەندۋ» جاڭا رەيسىن ىسكە قوسۋ مۇمكىندىگىن قاراستىردى.
«قول قويىلعان مەموراندۋم – الماتىنىڭ حالىقارالىق كولىك بايلانىسىن دامىتۋداعى ماڭىزدى قادام. جۇڭگو – الماتى ءتۋريزمىن دامىتۋداعى نەگىزگى ماقساتتى نارىقتىڭ ءبىرى. 2024 جىل قىتايداعى قازاقستان ءتۋريزمى جىلى بولىپ جاريالاندى، ال بيىلعى جىل – قازاقستانداعى جۇڭگو ءتۋريزمى جىلى. بىلتىر الماتىعا قىتايدان 95،3 مىڭنان استام تۋريست كەلدى، بۇل 54%-عا ءوسىم كورسەتتى. جاسالعان كەلىسىم اياسىندا تۋريستىك اعىننىڭ قارقىندى دامۋى جالعاسادى دەپ سەنەمىز»، – دەدى ەربولات دوسايەۆ.
«Tongcheng Travel جۇڭگو اگەنتتىگىنىڭ «2025 جىلدىڭ بولاشاعى ەڭ زور جاڭا باعىتى» ماراپاتى الماتىنىڭ تۋريستىك الەۋەتىنىڭ مويىندالعانىن جانە قىتايلىق تۋريستەردىڭ ايماققا دەگەن قىزىعۋشىلىعىنىڭ ارتقانىن كورسەتەدى. جالپى، 2024 جىلى الماتىعا شامامەن 2 ميلليون تۋريست كەلدى، ونىڭ ىشىندە 600 مىڭنان استامى شەتەلدىك. 2025 جىلى 2،3 ميلليون تۋريست، ونىڭ ىشىندە 700 مىڭ شەتەلدىك تۋريست كەلەدى دەپ كۇتىلۋدە»، – دەدى ەربولات دوسايەۆ.
ءوز كەزەگىندە China National Aviation Holding Company پرەزيدەنتى ما چونسيان مىرزا كەزدەسۋگە العىس ءبىلدىرىپ، بولاشاقتاعى جەمىستى ىنتىماقتاستىققا نيەتتى ەكەنىن جەتكىزدى. «الماتى – قازاقستاننىڭ مادەني، ىسكەرلىك جانە تۋريستىك ورتالىعى، سونداي-اق ەۋروپا مەن ازيانى بايلانىستىراتىن ماڭىزدى بۋىن. قازاقستاننىڭ باستى «اۋە قاقپاسى» رەتىندە الماتى ورتالىق ازيا بويىنشا ساياحاتتاردىڭ باستاپقى نۇكتەسى بولىپ تابىلادى»، – دەدى ول.
الماتى-بەيجىڭ باعىتىنداعى قوسىمشا رەيس پەن «الماتى-چەندۋ» باعىتىنداعى جاڭا رەيس 2024 جىلدىڭ ماۋسىم ايىندا ىسكە قوسىلادى دەپ جوسپارلانىپ وتىر. قازىرگى ۋاقىتتا ق ر كولىك مينيسترلىگىمەن بىرلەسىپ دايىندىق جۇمىستارى جۇرگىزىلۋدە. ءتيىستى باعىتتار ۇشۋ قۇقىقتارى بولىنگەننەن كەيىن اشىلادى.
«الماتى-بەيجىڭ» قوسىمشا رەيسى مەن «الماتى-چەندۋ» جاڭا رەيسىن بيىل ماۋسىم ايىندا ىسكە قوسۋ جوسپارلانۋدا. قازىرگى ۋاقىتتا دايىندىق جۇمىستارى جۇرگىزىلىپ جاتىر، ءتيىستى باعىتتار ۇشۋ قۇقىقتارى بولىنگەننەن كەيىن اشىلادى.
ايتا كەتەيىك، قازاقستاننىڭ ەڭ ءىرى قالاسى رەتىندە الماتى كولىك ينفراقۇرىلىمىن بەلسەندى تۇردە جاڭعىرتىپ كەلەدى. 2024 جىلى جاڭا حالىقارالىق اۋەجاي تەرمينالىنىڭ قۇرىلىسى اياقتالىپ، ونىڭ وتكىزۋ قابىلەتى جىلىنا 14 ميلليون جولاۋشىعا دەيىن ارتتى.
انىقتاما:
Air China – قىتايدىڭ جەتەكشى اۋە تاسىمالداۋشىسى جانە Star Alliance عالامدىق اۆياسيالىق اليانسىنىڭ مۇشەسى. بەيجىڭدەگى اۋە پاركىندە 952 اۋە كەمەسى بار، ونىڭ 535ء-ى Air China كومپانياسىنا تيەسىلى. قازىرگى ۋاقىتتا الماتىدان قحر-نىڭ مىنا قالالارىنا تىكەلەي رەيس اشىلعان: بەيجىڭ – ايىنا 53 رەيس (Air Astana – 22، China Southern Airlines – 31)، ءۇرىمجى – ايىنا 61 رەيس (Air Astana – 17، China Southern Airlines – 44)، سيان – ايىنا 9 رەيس (China Southern Airlines)، حانچجوۋ – ايىنا 18 رەيس (Loong Air)، سانيا – ايىنا 9 رەيس (Air Astana).