مەملەكەت باسشىسى باس پروكۋرور بەرىك اسىلوۆتى قابىلدادى.
بەرىك اسىلوۆ ەلىمىزدەگى زاڭ ۇستەمدىگىنىڭ جاي-كۇيى جانە قاداعالاۋ ورگاندارىنىڭ باسىم باعىتتارى بويىنشا اتقارعان جۇمىس قورىتىندىلارى تۋرالى باياندادى، دەپ حابارلايدى aqshamnews.kz.
كريمينوگەندىك جاعداي جانە قىلمىستىق-قۇقىقتىق سالاداعى ازاماتتاردىڭ كونستيتۋسيالىق قاقىن قامتاماسىز ەتۋگە باعىتتالعان شارالار جونىندە ەسەپ بەردى.
پروكۋراتۋرا ورگاندارى سوتقا دەيىنگى تەرگەۋ ساتىسىندا 32 مىڭنان استام زاڭسىز شەشىمدى توقتاتقان، بۇل ىستەر قىلمىستىق-پروسەستىك كودەكسكە ساي كەلمەيدى. 4 مىڭ ازاماتتىڭ قىلمىستىق ىسكە نەگىزسىز تارتىلۋىنا جول بەرمەگەن. سونىمەن قاتار زاڭسىز ۇستالعان 1،5 مىڭنان اسا ادام بوساتىلعان.
باس پروكۋروردىڭ قارسىلىعى نەگىزىندە جوعارعى سوت 150 تۇلعاعا قاتىستى ءىستىڭ ءمان-جايىن وڭ باعىتقا وزگەرتىپ، سونىڭ ىشىندە 10 ادام تولىق اقتالعان.
الەۋمەتتىك-ەكونوميكالىق سالادا 81 مىڭ كاسىپكەردىڭ، 979 مىڭ زەينەتكەردىڭ، حالىقتىڭ الەۋمەتتىك تۇرعىدان از قامتىلعان توپتارىنىڭ جانە باسقا دا ازاماتتاردىڭ بۇزىلعان قۇقىقتارى قالپىنا كەلتىرىلگەنىن حابارلادى. 123 مىڭ جۇمىسشىنىڭ ەڭبەك قۇقىعىن بۇزۋعا جول بەرىلمەگەن. جالپى سوماسى 4،5 ميلليارد تەڭگە بولاتىن اليمەنت بويىنشا قارىز وندىرىلگەن.
بىلتىر مەملەكەت پايداسىنا 627 ميلليارد تەڭگەدەن اساتىن وتەماقى قايتارىلعانى جونىندە ايتتى.
ەكونوميكاعا 12 تريلليون تەڭگەدەن استام قارجى قۇيعان 800 ينۆەستورعا پروكۋرورلىق كومەك بەرىلگەنىن ايتتى.
– پروكۋراتۋرا اكتىسى بويىنشا 136 لاۋازىمدى تۇلعا جاۋاپقا تارتىلعان؛
– پروكۋرورلار ينۆەستورلارعا قاتىستى مەملەكەتتىك ورگانداردىڭ 712 شەشىمىنە كەلىسىم بەرمەگەن؛
– ينۆەستيسيالىق جوبالارعا قولداۋ كورسەتۋ بارىسىندا «پروكۋرورلىق سۇزگىنى» پايدالانۋ ءوز تيىمدىلىگىن كورسەتكەن؛
– جالپىۇلتتىق پۋلعا ەنگەن جوبالاردىڭ جۇزەگە اسىرىلۋىن قاداعالاۋعا مۇمكىندىك بەرەتىن سيفرلى ينۆەستيسيالىق پلاتفورما بەلسەندى قىزمەت اتقارىپ كەلەدى؛
قوعام نازارىن اۋدارعان ءبىرقاتار قىلمىستىق ءىستى تەرگەۋ بارىسى جونىندە مالىمەت بەردى.
قىلمىسقا قارسى كۇرەستە سيفرلىق تەحنولوگيالاردى جاپپاي ەنگىزۋ جونىندە باياندادى. اتاپ ايتقاندا، ىزدەۋدە جۇرگەن ازاماتتاردى «اقىلدى» بەينەكامەرانىڭ كومەگىمەن تابۋ (ىزدەۋدە جۇرگەندەر سانى 9،4 پايىزعا ازايدى) ءتاسىلى جولعا قويىلدى.
قاسىم-جومارت توقايەۆ «زاڭ جانە ءتارتىپ» قاعيداسىن ىسكە اسىرۋ، بارلىق سالادا زاڭنامانىڭ ساقتالۋىن قامتاماسىز ەتۋ جۇمىستارىن جالعاستىرۋدى تاپسىردى. سونداي-اق الاياقتىققا قارسى ءىس-قيمىل، ەسىرتكى بيزنەسىمەن كۇرەس، قوعامدىق ورىنداردا قۇقىقبۇزۋشىلىقتىڭ الدىن الۋ بويىنشا قۇقىق قورعاۋ مەن باسقا دا مەملەكەتتىك ورگانداردىڭ قىزمەتىن ۇيلەستىرۋدىڭ ماڭىزىن اتاپ ءوتتى.