قازاقستان رەسپۋبليكاسى پرەمەر-مينيسترىنىڭ ورىنباسارى - سىرتقى ىستەر ءمينيسترى مۇحتار تىلەۋبەردى ۆەتنام سوسياليستىك رەسپۋبليكاسىنا رەسمي ساپارمەن باردى.
قازاقستاننىڭ سىرتقى ىستەر ءمينيسترىنىڭ بۇل ەلگە ساپارى ەكى مەملەكەت اراسىندا ديپلوماتيالىق قاتىناستار ورناعاننان بەرى 30 جىل ىشىندە العاش رەت بولىپ وتىر. حانويعا ساپاردىڭ رەسمي بولىگى حو شي مين كەسەنەسىنە گۇل شوقتارىن قويۋ راسىمىنەن باستالدى، دەپ حابارلايدى Almaty-akshamy.kz قازاقپاراتقا سىلتەمە جاساپ.
ساپاردىڭ ماقساتى – سوڭعى ونجىلدىقتار ىشىندە الەمدەگى ەڭ جوعارى ەكونوميكالىق دامۋ قارقىنىمەن ەرەكشەلەنەتىن ءداستۇرلى دوستاس ەلمەن سەرىكتەستىك قاتىناستاردى ودان ءارى دامىتۋ.
م. تىلەۋبەردى ۆسر سىرتقى ىستەر ءمينيسترى بۋي تحان شونمەن كەلىسسوزدەر وتكىزىپ، ونىڭ بارىسىندا تاراپتار ساياسي، ساۋدا-ەكونوميكالىق، ينۆەستيسيالىق جانە مادەني ىنتىماقتاستىق ماسەلەلەرىنىڭ كەڭ اۋقىمىن تالقىلادى. ەكى ەلدىڭ كوپجوسپارلى ىنتىماقتاستىعىنا جاڭا سەرپىن بەرۋگە، پەرسپەكتيۆادا بىرتىندەپ ارتىقشىلىقتى ەكونوميكالىق ارىپتەستىك دەڭگەيىنە شىعۋعا نيەت ءبىلدىردى. ۆەتنام قازان ايىندا نۇر-سۇلتان قالاسىندا وتەتىن اوسشك سامميتىنە جوعارى دەڭگەيدە قاتىساتىنىن راستادى.
ۆەتنام پرەزيدەنتى نگۋەن سۋان فۋكپەن كەزدەسۋدە ءسىم باسشىسى ۆەتنامدا جۇرگىزىلىپ جاتقان رەفورمالاردىڭ قارقىنى مەن ساپاسىن جوعارى باعالاپ، قازاقستاندى جاڭعىرتۋدىڭ جاڭا كەزەڭىنىڭ مازمۇنىمەن تانىستىردى.
ەكى ەل اراسىنداعى ساياسي ىنتىماقتاستىقتىڭ دامۋ ديناميكاسىن ەسكەرە وتىرىپ، م. تىلەۋبەردى جوعارى دەڭگەيدەگى ەكىجاقتى بايلانىستاردىڭ جاندانۋىن جاقتادى. سۇحبات بارىسىندا نگۋەن سۋان فۋك پرەزيدەنت قاسىم-جومارت توقايەۆتىڭ ۆەتنامعا الداعى رەسمي ساپارىن مازمۇندى تولىقتىرۋ جونىندە تاپسىرما بەردى.
ۆەتنام پرەمەر-مينيسترى فام بين تينمەن كەزدەسۋ ەكىجاقتى قارىم-قاتىناستاردىڭ ەكونوميكالىق كۇن تارتىبىنە ارنالدى. تاراپتار ءوزارا ساۋدا مەن ينۆەستيسيالاردىڭ وسۋىنە، ەكونوميكانىڭ ءتۇرلى سەكتورلارىندا كووپەراسيانى دامىتۋعا باعىتتالعان ماقساتتى كۇش-جىگەردىڭ قاجەتتىگىن اتاپ ءوتتى.
سونداي-اق، م. تىلەۋبەردى ونەركاسىپ جانە ساۋدا ءمينيسترى نگۋەن حونگ ديەنمەن كەلىسسوزدەر جۇرگىزدى، وندا قىركۇيەكتە حانوي قالاسىندا وتەتىن الداعى ۇكىمەتارالىق كوميسسيا وتىرىسىنىڭ تاقىرىبى تالقىلاندى.
قازاقستان دەلەگاسياسىنىڭ قۇرامىندا بولعان «استانا» حالىقارالىق قارجى ورتالىعىنىڭ باسقارۋشىسى قايرات كەلىمبەتوۆ ۆەتنامنىڭ قارجى مينيسترلىگىنىڭ، ۆەتنامنىڭ دامۋ بانكىنىڭ، سونداي-اق POCO كومپانياسىنىڭ باسشىلىعىمەن كەزدەسۋلەر وتكىزىپ، ولاردىڭ بارىسىندا قارجى جانە ينۆەستيسيالار سالاسىنداعى ىنتىماقتاستىقتىڭ پەرسپەكتيۆالىق باعىتتارىن تالقىلادى.
ساپار اياسىندا م. تىلەۋبەردى قازاقستانمەن ينۆەستيسيالىق ىنتىماقتاستىق مۇمكىندىكتەرىن زەرتتەيتىن ۆەتنامدىق كومپانيالاردىڭ باسشىلارىمەن ءبىرقاتار كەزدەسۋلەر وتكىزدى.
«Crystal Bay» كومپانياسى ديرەكتورلار كەڭەسىنىڭ ءتوراعاسى نگۋەن دىك چيمەن اڭگىمە بارىسىندا تۋريستىك سالاداعى ىنتىماقتاستىق ماسەلەلەرى تالقىلاندى. «Duc Giant Chemicals Group» كورپوراسياسىنىڭ باسشىسى داو حىي حۋەن حيميا ونەركاسىبىندەگى ىنتىماقتاستىق مۇمكىندىكتەرىنە قىزىعۋشىلىق تانىتتى.
«Thai Binh Seed» ۆەتنامداعى كۇرىش ءوسىرۋ سالاسىنداعى جەتەكشى ينستيتۋتتىڭ باس ديرەكتورى چان مان باو ۆەتنامدا وسىرىلەتىن، از مولشەردە سۋارۋدى قاجەت ەتەتىن كۇرىشتىڭ جاڭا سورتتارىنىڭ تيىمدىلىگى تۋرالى ايتتى.
«Vietjet» اۋە كومپانياسىنىڭ ۆيسە-پرەزيدەنتى نگۋەن تحان حۋنگپەن قازاقستان مەن ۆەتنام اراسىنداعى تىكەلەي اۋە قاتىناسىن اشۋ ماسەلەلەرى تالقىلاندى. اعىمداعى جىلدىڭ قازان ايىنان باستاپ الماتى - نياچانگ جانە نۇر-سۇلتان - نياچانگ باعىتتارى بويىنشا رەيستەر ىسكە قوسىلادى.