جاڭا تەرمينالدىڭ قۇرىلىسى تالقىلاندى
الماتى اكىمى ەربولات دوسايەۆتىڭ TAV Airports Holding جاڭا باس ديرەكتورى سەركان كاپتان جانە الماتى حالىقارالىق اۋەجايى باسشىلىعىمەن كەزدەسۋى بارىسىندا جاڭا تەرمينالدىڭ اعىمداعى قۇرىلىسى بويىنشا ماسەلەلەر تالقىلاندى. تاراپتار بۇدان بىلاي دا ءوزارا ىنتىماقتاستىققا دايىن ەكەندىكتەرىن ءبىلدىردى، دەپ حابارلايدى Almaty-akshamy.kz.
جاڭا تەرمينالدىڭ ىسكە قوسىلۋى جولاۋشىلاردى وتكىزۋ قابىلەتىن جىلىنا 7 ميلليوننان 14 ميلليونعا دەيىن ارتتىرادى جانە قالانىڭ بۇكىل ورتالىق ازياداعى ترانسپورتتىق-لوگيستيكالىق حاب رەتىندەگى پوزيسياسىن نىعايتادى.
«الماتى ءۇشىن اۋەجايدى دامىتۋعا باعىتتالعان ماسەلەلەر وتە ماڭىزدى. ويتكەنى، اۋەجاي قالانىڭ اۋە قاقپاسى ءارى اۋە الاڭى بولىپ تابىلادى. راسىندا دا، قالامىزدىڭ بولاشاقتا دامۋى اۋەجايدىڭ جاعدايىنا، ونىڭ ينفراقۇرىلىمىنا، سەرۆيس دەڭگەيى مەن ىڭعايلىلىعىنا تىكەلەي بايلانىستى. بىزدە الماتىنىڭ جوعارى مارتەبەسىنە لايىق بارلىق حالىقارالىق ستاندارتتارعا سايكەس زاماناۋي تەرمينال بولۋى ءتيىس. ءوز تاراپىمنان قالانىڭ بۇدان بىلاي دا جوباعا قولداۋ بىلدىرەتىنىن راستايمىن»، – دەدى ەربولات دوسايەۆ.
كەزدەسۋ بارىسىندا الماتى حالىقارالىق اۋەجايىنىڭ دامۋ پەرسپەكتيۆالارى مەن شەبەرلىك- جوسپارلارىن جىلدىڭ اياعىنا دەيىن ازىرلەۋ جانە اۋەجاي اۋماعىنداعى ترانسپورتتىق ينفراقۇرىلىمدى بىرلەسىپ دامىتۋ شارالارى تالقىلاندى. مەگاپوليس باسشىسى وسى قۇجاتتىڭ اعىمداعى جىلدىڭ اياعىنا دەيىن قابىلداناتىن قالانىڭ باس جوسپارىمەن سايكەس بولۋى ءتيىس ەكەنىن اتاپ ءوتتى.