الماتىدا مەملەكەت باسشىسىنىڭ تاپسىرماسىمەن جۇزەگە اسقان «ناۋرىز» جاڭا تۇرعىن ءۇي باعدارلاماسى اياسىندا تۇرعىن ءۇي سەرتيفيكاتىن الۋعا ءوتىنىش قابىلداۋ باستالدى. بۇل باستاما تۇرعىن ءۇي الۋدا كومەككە مۇقتاج حالىقتىڭ نەعۇرلىم وسال ساناتىن قولداۋعا باعىتتالعان، دەپ حابارلايدى aqshamnews.kz الماتى قالاسى كوممۋنالدىق ينفراقۇرىلىمدى دامىتۋ باسقارماسىنا سىلتەمە جاساپ.
الماتى قالاسى ءماسليحاتىنىڭ شەشىمىمەن باستاپقى جارنانىڭ ءبىر بولىگىن جابۋ ءۇشىن تۇرعىن ءۇي سەرتيفيكاتىن بەرۋگە قاراجات ءبولىندى. سەرتيفيكات مولشەرى 1،5 ملن تەڭگەگە دەيىن، ول وتەۋسىز ءارى قايتارىمسىز بەرىلەدى.
سەرتيفيكات الۋشىلارعا جاو كەزەكتە تۇرعانداردىڭ ىشىندەگى مىناداي ساناتتار جاتادى:
1. 1 جانە 2 توپتاعى مۇگەدەكتەر؛
2. مۇگەدەك بالالارى بار نەمەسە ولاردى تاربيەلەپ وتىرعان وتباسىلار؛
3. جەتىم بالالار مەن اتا-اناسىنىڭ قامقورلىعىنسىز قالعان بالالار؛
4. كوپبالالى وتباسىلار.
جاڭا ەرەجەگە سايكەس، سەرتيفيكات الۋ ءۇشىن وتباسىنىڭ ورتاشا تابىسىن راستاۋ قاجەت، ول وتباسىنىڭ ءاربىر مۇشەسىنە وسى قارجى جىلىنا بەلگىلەنگەن ەڭ تومەنگى كۇنكورىس دەڭگەيىنىڭ 3،1 ەسەلەنگەن كورسەتكىشىنەن (134 561،7 تەڭگە) اسپاۋعا ءتيىس.
وتباسى بانكىندە تولەم قابىلەتتىلىگىن راستاعان جانە تۇرعىن ءۇي تاپقان ازاماتتار «Kezekte.kz» سايتىنداعى («Amanat» سەرۆيسى ارقىلى) تۇرعىن ءۇي سەرتيفيكاتىنا ءوتىنىم بەرە الادى.
قاجەتتى قۇجاتتار:
1. جۇمىس ورنىنان انىقتامانىڭ ەلەكتروندىق كوشىرمەسى (الەۋمەتتىك وسال توپتارعا تالاپ قولدانىلمايدى)؛
2. يپوتەكالىق تۇرعىن ءۇي نەسيەسىن بەرۋ تۋرالى بانكتىڭ ماقۇلداۋ حاتىنىڭ ەلەكتروندىق كوشىرمەسى، وندا نەسيە سوماسى مەن اي سايىنعى تولەم مولشەرى كورسەتىلۋى كەرەك.
وتىنىشتەر 3 جۇمىس كۇنى ىشىندە قارالادى، بۇل تۇرعىن ءۇي كومەگىن الۋدى جىلدام ءارى قولجەتىمدى قىلادى.
بۇعان دەيىن تۇرعىن ءۇي سەرتيفيكاتى تەك «باقىتتى وتباسى» جانە «شاڭىراق» باعدارلامالارى اياسىندا بەرىلەتىن، ال جاڭا وزگەرىس تۇرعىن ۇيگە مۇقتاج ازاماتتاردى قولداۋ مۇمكىندىگىن كەڭەيتەدى.