3–7 ماۋسىم ارالىعىندا مينسك قالاسىندا «بەلاگرو-2025» اتتى 35ء-شى حالىقارالىق مامانداندىرىلعان كورمە ءوتتى.
اۋىل شارۋاشىلىعى، سيفرلاندىرۋ، اگروتەحنولوگيالار جانە اگروينجينيرينگ سالاسىنداعى وزىق شەشىمدەر الماسۋعا ارنالعان بۇل ماڭىزدى سالالىق شاراعا 14 ەلدەن 545-تەن استام كومپانيا مەن 200 مىڭنان استام ادام قاتىستى، دەپ حابارلايدى aqshamnews.kz.
قازاقستان اتالعان كورمەگە اۋىل شارۋاشىلىعى مينيسترلىگى مەن سولتۇستىك قازاقستان وبلىسى اكىمدىگىنىڭ قولداۋىمەن ۇيىمداستىرىلعان «اگروشوس» ارنايى ەكسپوزيسياسى اياسىندا قاتىستى. قازاقستان دەلەگاسياسىن ق ر اشم اگروازىق-تۇلىك نارىقتارى جانە اۋىل شارۋاشىلىعى ونىمدەرىن قايتا وڭدەۋ دەپارتامەنتىنىڭ ديرەكتورى ساۋلە جۇرىنوۆا باستاپ باردى.
ەكسپوزيسيادا وتاندىق اگرارلىق ونىمدەردىڭ 40-قا جۋىق اتاۋى ۇسىنىلدى — كۇنباعىس جانە سافلور مايى، ەت جانە ءسۇت ونىمدەرى، كونديتەرلىك بۇيىمدار مەن قايتا وڭدەلگەن اۋىل شارۋاشىلىعى تاۋارلارى. قاتىسۋشىلار قاتارىندا ەلىمىزدىڭ جەتەكشى كاسىپورىندارى، قازاقستاننىڭ مايلى داقىلداردى قايتا وڭدەۋشىلەردىڭ ۇلتتىق قاۋىمداستىعى، 35-تەن استام ءسۇت ءونىمىن شىعاراتىن سولتۇستىك قازاقستان وبلىسىنىڭ ءىرى اۋىل شارۋاشىلىعى كاسىپورنى «زەنچەنكو ي ك» كت، ماي، قايماق، ىرىمشىك وندىرەتىن «Eurasian Milk» كومپانياسى، شوشقا ءوسىرۋ جانە ەت ونىمدەرىن Lecker برەندىمەن وندىرەتىن «EMC Agro» ج ش س، تمد جانە ورتالىق ازيا ەلدەرىنە ۇن مەن ماكارون ونىمدەرىن ەكسپورتتاۋشى «سۇلتان-ەممك» اق، جوعارى پروتەيندى مال ازىعى قوسپالارىن شىعاراتىن «سك پروتەين» ج ش س، تولىق سيكلدى ەت وڭدەۋ كاسىپورنى «كازمياسوپرودۋكت» ج ش س جانە باسقا دا كومپانيالار بولدى.
كورمە بارىسىندا قازاقستاندىق ونىمدەر جوعارى باعالانىپ، بۇل ەلىمىزدىڭ اگروونەركاسىپتىك كەشەنىنىڭ حالىقارالىق دەڭگەيدەگى باسەكەگە قابىلەتتىلىگىن كورسەتتى. ق ر اشم بەلسەندى قاتىسقانى جانە اگروسالاداعى جەتىستىكتەرى ءۇشىن كورمەنىڭ التىن مەدالىمەن ماراپاتتالدى.
ءىس-شارا اياسىندا «اگروشوس» فورۋمى ءوتتى، ونىڭ تاقىرىبى — «شىۇ ەلدەرىنىڭ ازىق-تۇلىك قاۋىپسىزدىگىن قامتاماسىز ەتۋ». وندا دەلەگاسيا مۇشەلەرى ەلىمىزدىڭ وڭىرلىك ازىق-تۇلىك تۇراقتىلىعىنا قوسقان ۇلەسى تۋرالى بايانداما جاسادى.
بەلارۋس اۋىل شارۋاشىلىعى مينيسترلىگى وكىلدەرىمەن ەكىجاقتى كەزدەسۋلەر بارىسىندا ءسۇت-تاۋارلى فەرمالار سالۋ، عىلىمي زەرتتەۋلەر جۇرگىزۋ سىندى بىرلەسكەن جوبالار تالقىلاندى.
«بەلاگرو-2025» كورمەسىنە قاتىسۋ قازاقستاندىق اۋىل شارۋاشىلىعى ونىمدەرىن سىرتقى نارىققا ىلگەرىلەتۋ، جاڭا ىسكەرلىك بايلانىستار ورناتۋ جانە اوك-تىڭ ەكسپورتتىق الەۋەتىن ارتتىرۋ جولىنداعى ماڭىزدى قادام بولدى. كورمە قازاقستاننىڭ اگرارلىق باستامالارىنا حالىقارالىق قوعامداستىقتىڭ جوعارى قىزىعۋشىلىعىن تاعى ءبىر مارتە دالەلدەدى.