الماتى قالاسى ءبىلىم باسقارماسىنىڭ قالالىق ءبىلىم بەرۋدەگى جاڭا تەحنولوگيالاردىڭ عىلىمي-ادىستەمەلىك ورتالىعى Bonduelle Kazakhstan كومپانياسىمەن بىرلەسىپ، دۇرىس تاماقتانۋعا ارنالعان «ءدام تۋرالى تالاس / و ۆكۋساح سپوريات» اتتى جاڭا الەۋمەتتىك جوبانى ىسكە قوستى.
وسى جوبا شەڭبەرىندە الماتى مەكتەپتەرى «كوكونىس ايىن» وتكىزۋدە. ونىڭ ماقساتى – بالالارعا دۇرىس تاماقتانۋ ادەتتەرىن جانە كوكونىستەردىڭ پايداسى تۋرالى ايتۋ. باستاۋىش سىنىپ وقۋشىلارى دۇرىس تاماقتانۋ تۋرالى كوپتەگەن قىزىقتى تاپسىرمالاردى ورىنداۋ ارقىلى كوكونىستەردىڭ ءدامىن، قاجەتتىلىگىن، تيىمدىلىگىن بىلەدى.
ءيا، باستاۋىش سىنىپ وقۋشىلارىنىڭ دەنساۋلىعىن نىعايتۋعا ىقپالى مول جوبا شەڭبەرىندە قالاداعى №52 جالپى ءبىلىم بەرەتىن مەكتەپتىڭ 3-سىنىپ وقۋشىلارىنا بىرەگەي ساباق وتكىزىلدى. ساباقتا وقۋشىلار كوكونىستەردىڭ ادام اعزاسىنا پايداسى تۋرالى جان-جاقتى تانىسىپ، بىلىمدەرىن بەكىتتى. «ءدام تۋرالى تالاس / و ۆكۋساح سپوريات» جوبا ۇيلەستىرۋشىلەرى ءىس-شاراعا قاتىسىپ، وقۋشىلارعا ەستەلىك سىيلاقتار بەرىپ، بەلسەندىلىك تانىتقان ورەندەرگە “ماقتاۋ قاعازىمەن” ماراپاتتادى.