بۇل تۋرالى الماتى قالاسى ءبىلىم باسقارماسى باسشىسىنىڭ ورىنباسارى ايدىن سايلاۋباي ايتىپ بەردى.
الماتى وڭىرلىك كوممۋنيكاسيالار قىزمەتىنىڭ بريفينگىندە مەگاپوليس مەكتەپتەرىنىڭ جاڭا وقۋ جىلىنا دايىندىعىنا ارنالعان بريفينگ ءوتتى، دەپ حابارلايدى Almaty-akshamy.kz.
ورتا ءبىلىم بەرۋ سەكتورىندا 301 مەكتەپ بار، ونىڭ 210-ى مەملەكەتتىك، 91ء-ى جەكەمەنشىك. كۇتىلەتىن ستۋدەنتتەر سانى 290 مىڭنان اسادى.
ءسوز باسىندا ايدىن سايلاۋباي «مەكتەپكە جول» اكسياسىنىڭ العاشقى ناتيجەلەرىنە توقتالدى. بيىلعى جىلى ءار وقۋشىعا مەكتەپ فورماسى مەن كەڭسە تاۋارلارىن الۋعا 43 000 تەڭگە ءبولىندى، ونىڭ 35 000 تەڭگەسى - مەكتەپ فورماسىنا، 8 000 تەڭگەسى - مەكتەپكە قاجەتتى قۇرال-جابدىقتارعا. كومەكپەن 19 701 بالا قامتىلدى، بۇل ماقساتقا جەرگىلىكتى بيۋدجەتتەن 847 ميلليون تەڭگە ءبولىندى. تولەمدەر اتا-انالاردىڭ ەسەپ كارتالارىنا 100% قاراجات اۋدارۋ ارقىلى جۇزەگە اسىرىلدى.
«اكسيا اياسىندا دەمەۋشىلەر ءحاوت ساناتىنداعى بالالارعا 5،6 مىڭنان استام مەكتەپ فورماسى مەن مەكتەپ كەرەك-جاراقتارى بار ريۋكزاكتاردى سىيعا تارتتى»، - دەدى ا. سايلاۋباي.
تاقىرىپتى جالعاستىرا وتىرىپ، ءبىلىم باسقارماسى باسشىسىنىڭ ورىنباسارى جەرگىلىكتى بيۋدجەتتەن وقۋلىقتار مەن كوركەم ادەبيەتتى ساتىپ الۋعا 3 ملرد 263 ملن 457 مىڭ تەڭگە بولىنگەنىن حابارلادى. بيىل 2 سىنىپ وقۋشىلارى جاڭا وقۋلىقتار الادى. 1-11 سىنىپ وقۋشىلارى 25 تامىزعا دەيىن 100% تەگىن وقۋلىقتارمەن قامتاماسىز ەتىلەدى.
«جاڭا وقۋ جىلىندا 300 ملن تەڭگەگە كوركەم ادەبيەت كىتاپتارى جانە 37،11 ملن تەڭگەگە ينتەللەكتىسى بۇزىلعان ارنايى مەكتەپتەرگە ارنالعان وقۋلىقتار، سوقىر بالالارعا ارنالعان رەلەفتى-نۇكتەلى برايل قارپىندەگى وقۋلىقتار جانە ناشار كورەتىن بالالارعا ارنالعان ىرىلەندىرىلگەن ءقارىپ وقۋلىقتارى ساتىپ الىنادى»، - دەپ تولىقتىردى وكق سپيكەرى.
ايدىن سايلاۋباي اعىمداعى جىلدىڭ 1 قىركۇيەگىنەن باستاپ مەملەكەتتىك مەكتەپتەردىڭ 1-4 سىنىپ وقۋشىلارى تەگىن تاماقپەن قامتاماسىز ەتىلەتىنىن ايتتى. بۇل ماقساتقا جەرگىلىكتى بيۋدجەتتەن جىل سوڭىنا دەيىن 5،3 ملرد تەڭگە ءبولىندى.
ءسوز سوڭىندا سپيكەر الماتى قالاسىندا كوك ءتۇستى مەكتەپ فورماسى بەلگىلەنگەنىن ەسكە سالدى.