الماتى ونكولوگتارى ەلىمىزدە العاش بولىپ حيميوپرەپاراتتاردى دايىنداۋعا ارنالعان روبوتتاندىرىلعان KiroOncology جۇيەسىن ەنگىزدى.
الماتى قالاسى قازاقستانداعى تەحنولوگيالىق مەديسينانىڭ فلاگمانىنا اينالۋدا. ەلىمىزدە العاش رەت الماتىلىق ونكولوگيالىق ورتالىقتا حيميوتەراپيالىق پرەپاراتتاردى دايىندايتىن KiroOncology روبوتتاندىرىلعان جۇيەسى ىسكە قوسىلدى. بۇعان دەيىن مۇنداي تەحنولوگيا ەۋروپا مەن اقش كلينيكالارىندا عانا قولدانىلعان ەدى. بۇل تۋرالى الماتى قالاسى وڭىرلىك كوممۋنيكاسيالار قىزمەتىنىڭ الاڭىندا وتكەن باسپا ءسوز ءماسليحاتىندا قالا اكىمىنىڭ ورىنباسارى نۇرلان ءابدىراحىم مالىمدەدى.
سونداي-اق ەلىمىزدە العاش رەت الماتى قالاسىنداعى №3 ەمحانادا جاساندى ينتەللەكت نەگىزىندە جۇمىس ىستەيتىن داۋىستىق روبوتتار ىسكە قوسىلدى. ولار تىركەۋشى قىزمەتىن اتقارىپ، پاسيەنتتەردىڭ وتىنىشتەرىن قابىلداپ، كەڭەس بەرەدى جانە جۇكتەمەنى اۆتوماتتى تۇردە بولەدى. الداعى ۋاقىتتا بۇل تاجىريبە بارلىق قالالىق ەمحانالارعا ەنگىزىلمەك.
«الماتى مەديسينا سالاسىن دالىرەك، ءقاۋىپسىز ءارى قولجەتىمدى ەتەتىن زاماناۋي تەحنولوگيالاردى ەنگىزىپ كەلەدى»، – دەدى نۇرلان ءابدىراحىم.
سونىمەن قاتار، قالالىق كارديولوگيالىق ورتالىق بازاسىندا العاش رەت قالالىق دەڭگەيدە جۇرەك ترانسپلانتاسياسى بويىنشا وتا جاساۋعا دايىندىق جۇرگىزىلۋدە.
كادرلىق الەۋەتكە دە ەرەكشە نازار اۋدارىلعان. قالا اكىمىنىڭ ورىنباسارىنىڭ ايتۋىنشا، جىل سايىن قالانىڭ مەديسينا مەكەمەلەرىنە 400 جاس مامان كەلىپ، تۇرعىن ۇيمەن جانە الەۋمەتتىك كەپىلدىكتەرمەن قامتاماسىز ەتىلەدى. سونداي-اق، سۇرانىسقا يە باعىتتار بويىنشا 124 دارىگەر رەزيدەنتۋراعا جىبەرىلدى.