الماتى دەنساۋلىق ساقتاۋ سالاسىنىڭ نەگىزگى كورسەتكىشتەرى بويىنشا ەل كولەمىندە كوش باستاپ تۇر. بۇل تۋرالى الماتى قالاسى اكىمىنىڭ ورىنباسارى نۇرلان ءابدىراحىم وڭىرلىك كوممۋنيكاسيالار قىزمەتىنىڭ ءباسپاسوز-ماسليحاتىندا مالىمدەدى.
ونىڭ ايتۋىنشا، قالا اكىمدىگى ءۇشىن دەنساۋلىق ساقتاۋ جۇيەسىن دامىتۋ – باستى باسىمدىقتاردىڭ ءبىرى. نەگىزگى ماقسات – ءاربىر الماتىلىق ءۇشىن مەديسينالىق كومەكتىڭ ساپاسى مەن قولجەتىمدىلىگىن ارتتىرۋ.
قازىرگى تاڭدا قالادا 221 مەديسينالىق ۇيىم جۇمىس ىستەيدى. وندا 36 مىڭنان استام مەديسينا قىزمەتكەرى، سونىڭ ىشىندە 10 مىڭ دارىگەر ەڭبەك ەتۋدە. 2025 جىلى سالانى دامىتۋعا 58 ملرد تەڭگە ءبولىندى، ونىڭ ىشىندە 56،2 ملرد تەڭگە – قالالىق بيۋدجەتتىڭ قاراجاتى.
2025 جىلدىڭ 9 ايىنىڭ قورىتىندىسى بويىنشا، الماتى دەنساۋلىق ساقتاۋ كورسەتكىشتەرىنىڭ بارلىعى بويىنشا تۇراقتى ءوسىم كورسەتۋدە:
انا ءولىمى – نولگە تەڭ. رەسپۋبليكا بويىنشا ورتاشا كورسەتكىش – 100 مىڭ ءتىرى تۋعانعا شاققاندا 9،5 جاعداي؛
سابيلەر ءولىمى رەسپۋبليكا دەڭگەيىنەن 23%-عا تومەن جانە وتكەن جىلمەن سالىستىرعاندا 22،7%-عا ازايعان؛
ونكولوگيالىق ءولىم-جىتىم رەسپۋبليكا كورسەتكىشىنەن 8%-عا تومەن؛
تۋبەركۋلەزبەن سىرقاتتانۋ دەڭگەيى ورتاشا رەسپۋبليكالىق كورسەتكىشتەن 1،7 ەسە تومەن.
«بۇل ناتيجەلەر – الدىن الۋ شارالارىنىڭ، دياگنوستيكانى جاڭعىرتۋدىڭ جانە قالالىق دارىگەرلەردىڭ كاسىبي شەبەرلىگىنىڭ جەمىسى»، – دەپ اتاپ ءوتتى الماتى قالاسى اكىمىنىڭ ورىنباسارى.