الماتى مەديسينالىق ءتۋريزمدى دامىتۋدا: جىل سايىن قالا كلينيكالارىندا 15 مىڭنان استام شەتەل ازاماتى ەم قابىلدايدى.
الداعى جىلدارى الماتىدا 30-دان استام دەنساۋلىق ساقتاۋ نىسانىنىڭ قۇرىلىسى مەن جاڭعىرتۋى باستالادى
الماتى قالاسىندا دەنساۋلىق ساقتاۋ جۇيەسىن جاڭعىرتۋدىڭ اۋقىمدى باعدارلاماسى جالعاسۋدا. قالا سوڭعى ون جىلداعى ەڭ ءىرى قۇرىلىس جانە جاڭعىرتۋ جوبالارىن جۇزەگە اسىرۋدا.
الماتى قالاسى اكىمىنىڭ ورىنباسارى نۇرلان ءابدىراحىم وڭىرلىك كوممۋنيكاسيالار قىزمەتىنىڭ باسپا ءسوز الاڭىندا وتكەن بريفينگتە مالىمدەگەندەي، 2025 جىلدىڭ سوڭىنا دەيىن ەكى باستاپقى مەديسينالىق-سانيتارلىق كومەك ورتالىعى مەن ءبىر جەدەل جاردەم قوسالقى ستانسياسىنىڭ، سونداي-اق ءار اۋىسىمدا 500 كەلۋشىگە ارنالعان بەس جاڭا ەمحانانىڭ قۇرىلىسى اياقتالادى.
جاڭا نىساندار دۋمان، قۇرامىس، شۇعىلا، التاي-1 شاعىن اۋداندارىندا جانە ايتەكە بي كوشەسىندە ورنالاسادى.
الداعى جىلدارى 30-دان استام مەديسينالىق نىساننىڭ قۇرىلىسى مەن قايتا جاڭعىرتىلۋى جوسپارلانىپ وتىر، ولاردىڭ قاتارىندا:
300 توسەككە ارنالعان كوپسالالى اۋرۋحانا (دارابوز شاعىناۋدانى)؛
200 توسەككە ارنالعان پەريناتالدىق ورتالىق؛
№4، №7 اۋرۋحانالارى مەن №1 پەرزەنتحانانىڭ جاڭا كورپۋستارى؛
پسيحيكالىق دەنساۋلىق ورتالىعى جانە بالالاردى وڭالتۋ ورتالىعى بار.
«سوڭعى 10 جىلدا مۇنداي اۋقىمداعى جاڭعىرتۋ جۇمىستارى جۇرگىزىلمەگەن. ءبىز الداعى جىلدارعا ارنالعان ساپالى مەديسينالىق ينفراقۇرىلىمدى قالىپتاستىرىپ جاتىرمىز»، - دەدى قالا اكىمىنىڭ ورىنباسارى.
قازىرگى ۋاقىتتا الماتىدا 14 قوسالقى ستانسيا جانە 188 جەدەل جاردەم بريگاداسى جۇمىس ىستەيدى. ولار تاۋلىگىنە ءۇش مىڭعا دەيىن شاقىرتۋعا قىزمەت كورسەتەدى.
ايتا كەتەيىك، رەسپۋبليكا كۇنىنە وراي قالالىق جەدەل مەديسينالىق جاردەم قىزمەتى 50 جاڭا اۆتوكولىكپەن تولىقتى. ونىڭ ىشىندە 12 “س” كلاستى رەانيموبيل جانە 38 “ۆ” كلاستى سانيتارلىق كولىك بار. اۆتوپاركتى جاڭارتۋعا جالپى 3 ملرد تەڭگە جۇمسالدى. بارلىق كولىكتەر حالىقارالىق ستاندارتتارعا ساي زاماناۋي جابدىقتارمەن قامتاماسىز ەتىلگەن.
«جاڭارتىلعان اۆتوپارك شۇعىل كومەك كورسەتۋدى بۇرىنعىدان دا جىلدام ءارى ساپالى ەتۋگە مۇمكىندىك بەرەدى»، - دەپ اتاپ ءوتتى نۇرلان ءابدىراحىم.
سونىمەن قاتار، الماتى قازاقستانداعى مەديسينالىق ءتۋريزمنىڭ جەتەكشى ورتالىعى مارتەبەسىن ساقتاپ كەلەدى. جىل سايىن مەگاپوليس كلينيكالارىندا 15 مىڭنان استام شەتەل ازاماتى ەم قابىلدايدى. ەڭ كوپ سۇرانىسقا يە باعىتتار – كارديوحيرۋرگيا، ورتوپەديا، ونكولوگيا، رەپرودۋكتيۆتى جانە ەستەتيكالىق مەديسينا.