الماتىدا جاڭا رەداكسياداعى ءۇي يەلەرى ءۇشىن كوممۋنالدىق قالدىقتاردىڭ ءتۇزىلۋى مەن جيناقتالۋىنىڭ ەسەپتىك نورمالارى ءبىر تۇرعىنعا جىلىنا 2،33 تەكشە مەتردى قۇرايدى (قولدانىستاعى نورمالار - جىلىنا 2،9 م3). بۇل نورمالاردى VIII شاقىرىلعان ءماسليحاتتىڭ كەزەكتەن تىس XVI سەسسياسىندا ءماسليحات دەپۋتاتتارى بەكىتتى.
سونداي-اق، الەۋمەتتىك، مادەني، ونەركاسىپتىك، كوممەرسيالىق جانە باسقا دا وبەكتىلەر ءۇشىن كوممۋنالدىق قالدىقتاردىڭ ءتۇزىلۋى مەن جيناقتالۋىنىڭ ەسەپتىك نورمالارى وزگەرتىلدى (سالىستىرمالى كەستە www.almaty.kz سايتىندا ورنالاستىرىلعان).
الماتى قالاسى بويىنشا كوممۋنالدىق قالدىقتاردىڭ ءتۇزىلۋى مەن جيناقتالۋىنىڭ قولدانىستاعى نورمالارى الماتى قالاسى ءماسليحاتىنىڭ 2015 جىلعى ناۋرىزداعى شەشىمىمەن بەكىتىلگەن بولاتىن. الماتى قالاسىنىڭ ەكولوگيا جانە قورشاعان ورتا باسقارماسى حابارلاعانداي، ق ر «قاتتى تۇرمىستىق قالدىقتارعا ارنالعان پوليگوندار» قۇرىلىس نورمالارىنا سايكەس قتق جيناقتاۋ نورمالارىن ناقتىلاۋدى ءار 5 جىل سايىن جۇرگىزۋ ۇسىنىلادى.
2022-2023 جىلدارى وزەكتەندىرۋ ماقساتىندا كوممۋنالدىق قالدىقتاردىڭ ءتۇزىلۋى مەن جيناقتالۋىنىڭ جاڭا نورمالارىن ازىرلەۋ بويىنشا باسقارما جۇمىستار جۇرگىزدى. زەرتتەۋلەر ماۋسىم سايىن (كوكتەم، جاز، كۇز، قىس) جۇرگىزىلدى، 27،5 مىڭ ادامدى قامتيتىن 16 ۋچاسكە (ءار اۋداننان 2 ۋچاسكەدەن) تاڭدالدى. زەرتتەۋ ناتيجەلەرى بويىنشا ءۇي يەلەرى مەن باسقا وبەكتىلەر ءۇشىن كوممۋنالدىق قالدىقتاردىڭ جيناقتالۋ نورمالارىن قايتا قاراۋ ۇسىنىلدى.