«ءبىرىنشى بولۋ – باتىلدىق» كورپوراتيۆتىك قورى AYALA قايىرىمدىلىق قورىمەن بىرلەسىپ، قازاقستانداعى نارەستەلەر مۇگەدەكتىگىنىڭ دەڭگەيىن تومەندەتۋ جۇمىستارىن جالعاستىرۋدا.
بيىل Almaty Marathon قاتىسۋشىلارى مەن سەرىكتەستەرىنىڭ جارنالارى ەسەبىنەن جالپى سوماسى 145 000 000 تەڭگەنى قۇرايتىن ەكى بىرەگەي جوبا ىسكە قوسىلادى. ولاردىڭ ورتاق ميسسياسى – بالالار مۇگەدەكتىگىن بولدىرماي، ولارعا باقىتتى بولاشاق سىيلاۋ.
قازاقستان رەسپۋبليكاسى دەنساۋلىق ساقتاۋ مينيسترلىگىنىڭ مالىمەتىنشە، تامىرلىق مالفورماسيالار – بالالاردى ءومىر بويى اۋىرسىنۋ، قان كەتۋ، اعزا قىزمەتىنىڭ بۇزىلۋى، ال كەي جاعدايلاردا ايقىن كوسمەتيكالىق اقاۋلارمەن بىرگە ءومىر سۇرۋگە ماجبۇرلەيتىن تۋا بىتكەن دەرت. قازاقستاندا مۇنداي دياگنوز قويىلعان ناۋقاستارعا مەديسينالىق كومەك ازىرگە كورسەتىلمەيدى، سوندىقتان وتباسىلار ەمدەلۋ ءۇشىن شەتەلگە جۇگىنۋگە ءماجبۇر. 2021–2024 جىلدار ارالىعىندا مەملەكەت وسى ماقساتتارعا 437 ملن تەڭگەدەن استام قارجى ءبولدى.
Almaty Marathon سپورتشىلارى مەن سەرىكتەستەرىنىڭ قولداۋىنىڭ ارقاسىندا الماتىداعى پەدياتريا جانە بالالار حيرۋرگياسى عىلىمي ورتالىعىندا جاڭا مەديسينالىق جابدىق ورناتىلادى. ول دارىگەرلەرگە مۇنداي دياگنوزى بار بالالاردى ەلىمىزدە ەمدەۋگە جول اشادى. ورتالىقتىڭ دارىگەرلەر بريگاداسى گەرمانياداعى تامىر مالفورماسيالارىن ەمدەۋگە ماماندانعان جەتەكشى كلينيكادا وقۋدان وتەدى.
جوبا اياسىندا جىل سايىن 100-گە جۋىق وتا جاسالىپ، 50-گە دەيىن بالاعا كومەك كورسەىلەدى.
كورپوراتيۆتىك «ءبىرىنشى بولۋ - باتىلدىق» قورىنىڭ قامقورشىلىق كەڭەسىنىڭ ءتوراعاسى عالىمجان ەسەنوۆ اتاپ ءوتتى:
«Almaty Marathon – بۇل تەك سپورت قانا ەمەس. قازاقستاننىڭ ءار قالاسىندا مىڭداعان اتلەت جۇرەكتەرىن بىرىكتىرىپ، جىل سايىن يگى ىستەرگە ۇلەس قوسىپ كەلەدى. قىركۇيەكتە الماتىدا وتكەن ون ءتورتىنشى مارافون اياسىندا ءبىز ەكى جاڭا جوبانى باستادىق. ولاردىڭ تۇپكى ماقساتى – بالالاردىڭ دەنساۋلىعى مەن باقىتتى بولاشاعى. دەنساۋلىق ساقتاۋ مينيسترلىگى جانە AYALA قورىنىڭ قولداۋىمەن بالالار مەديسيناسىنىڭ جاڭا كەزەڭىنە ۇلەس قوسىپ وتىرعانىمىز بىزگە شابىت بەرەدى».
جوبا 2026 جىلدىڭ سوڭىنا دەيىن جۇزەگە اسىپ، ەلىمىزدىڭ تۇكپىر-تۇكپىرىندەگى بالالاردىڭ ءومىر ساپاسىن جاقسارتۋعا ىقپال ەتپەك.
«الەمدى كورەمىن»: شالا تۋعان سابيلەردىڭ كوزىنە جارىق سىيلاۋ
رەتينوپاتيا – شالا تۋعان نارەستەلەرگە ءتان اۋرۋ. ونىڭ سىرتقى بەلگىلەرى بولمايدى: اتا-انالار سابيىنە قاراپ، ءبارى جاقسى دەپ ويلايدى، ءبىراق ول كەز كەلگەن ساتتە كورۋ قابىلەتىنەن ايىرىلىپ قالۋى مۇمكىن. بۇل دەرتتى دەر كەزىندە انىقتاپ، ەم جۇرگىزۋ ءۇشىن جوعارى بىلىكتى نەوناتالدى وفتالمولوگ پەن ارنايى جابدىق قاجەت.
2025 جىلى شىمكەنت قالالىق پەريناتالدىق ورتالىعىنا قورلار رەتينالدى كامەرا ورناتىپ، جۇزدەگەن شالا تۋعان سابيلەر دەر كەزىندە دياگنوستيكادان ءوتىپ، ەمدەلدى. جوبانىڭ ءساتتى ىسكە قوسىلۋىنان كەيىن ول تۇركىستان وبلىسىندا جالعاسىن تابادى – بۇل وڭىردە جىل سايىن 60 مىڭنان استام ءسابي دۇنيەگە كەلەدى، ولاردىڭ شامامەن 5 مىڭى شالا تۋعاندار.
جاقىن ارادا تۇركىستان قالاسىنداعى №3 وبلىستىق پەريناتالدىق ورتالىققا لازەرلىك قوندىرعى جەتكىزىلىپ، شالا تۋعان بالالارداعى رەتينوپاتيانىڭ اسقىنعان تۇرلەرىن ەمدەۋگە مۇمكىندىك تۋادى. وسىلايشا دارىگەرلەر سابيلەردى تاۋەكەلگە سالماي-اق، شىمكەنتكە نەمەسە الماتىعا شۇعىل جەتكىزۋدىڭ قاجەتى بولمايدى.
«الەمدى كورەمىن» جوباسى ىسكە اسقالى بەرى بەس جىل ىشىندە ەلىمىزدىڭ كوپتەگەن وڭىرىندە جاڭا تۋعان سابيلەر اراسىنداعى كورۋ قابىلەتىن جوعالتۋ دەرەكتەرى دەرلىك نولگە دەيىن ازايدى. تۇركىستان وبلىسىنا اكەلىنەتىن جاڭا لازەرلىك قوندىرعى وتالاردىڭ 90 پايىزىن جەرگىلىكتى دەڭگەيدە جاساۋعا جول اشىپ، شالا تۋعان بالالاردىڭ كورۋ قابىلەتىن ساقتاۋعا كومەكتەسەدى. بۇل رەتينوپاتيادان جانە كوزدىڭ وزگە دە پاتولوگيالارىنان بولاتىن بالالار سوقىرلىعى ءقاۋپىن ايتارلىقتاي تومەندەتەدى.
ەكى جوبا دا قازاقستاندا زاماناۋي مەديسينالىق تەحنولوگيالاردىڭ ەنگىزىلۋىنە جول اشىپ وتىر. ءبىر بالالار ءۇشىن بۇل – تامىر پاتولوگياسى مەن اۋىرسىنۋدان ارىلۋعا مۇمكىندىك بولسا، ەندى بىرەۋلەرى ءۇشىن – كورۋ قابىلەتىن ساقتاپ، الەمدى تانۋ مۇمكىندىگى.
Almaty Marathon – ورتالىق ازياداعى ەڭ ءىرى جۇگىرۋ مەرەكەسى. 2012 جىلدان بەرى ونىڭ اياسىندا جالپى سوماسى 300 ملن تەڭگەدەن اساتىن 30-دان استام قايىرىمدىلىق جوباسى ىسكە استى. بيىلعى ون ءتورتىنشى مارافون 28 قىركۇيەكتە وتەدى، وعان 16 مىڭنان استام ادام قاتىسپاق. جارىس باستالماي تۇرىپ-اق ەكى جاڭا رەكورد ورناتىلدى: شەتەلدىك قاتىسۋشىلار سانى 1 200-دەن استى، ال مارافوندىق 42،2 شاقىرىمدىق قاشىقتىققا 1 500 ادام ءوتىنىش بەرگەن.