ءانشى ديماش قۇدايبەرگەن الماتىدا جانكۇيەرلەرىمەن كەزدەسۋدە بوكس پەن ارالاس جەكپە-جەكتى بالا كەزىنەن جاقسى كورەتىنىن ايتتى، دەپ حابارلايدى Almaty-akshamy.kz Inform.kz-كە سىلتەمە جاساپ.
ديماش شارا كەزىندە جۇرگىزۋشىلەردىڭ سۇراعىنا جاۋاپ بەرە وتىرىپ، بوكسشى گەنناديي گولوۆكيندى قاتتى قۇرمەتتەيتىنىن اتاپ ءوتتى.
«گەنناديي گولوۆكيندى «كانەلومەن» جەكپە-جەگىنەن كەيىن قۇتتىقتادىم. ول 40-قا كەلگەنىنە قاراماستان، مىقتى ونەر كورسەتتى جانە كۇشتى قارسىلاسىمەن 12 راۋند بوكستاستى. بۇل - سيرەك كەزدەسەتىن قابىلەت جانە قۇرمەتتەۋگە تۇرارلىق. گەنا مەن ءۇشىن ءاردايىم چەمپيون. باتىرىمىزعا مىقتى دەنساۋلىق پەن تابىس تىلەيمىن»، - دەدى ءانشى.
ديماش گەنناديي گولوۆكينمەن جەتى جىلدان بەرى تانىس ەكەنىن ايتتى.
«ول مەنىڭ اعام سياقتى، ءبىز ءاردايىم ءبىر-بىرىمىزدى قولدايمىز، ىنتالاندىرىپ، جىگەرلەندىرىپ وتىرامىز. گەنناديي سياقتى ەلىمىزدىڭ داڭقىن شىعاراتىن چەمپيوندارىمىز كوپ بولسىن»، - دەدى ول.
ديماش قۇدايبەرگەن GGG جەكپە-جەگىنىڭ الدىندا ءانۇران ورىنداۋدى بۇرىننان جوسپارلاعانىن ايتتى. جوسپارى ورىندالىپ، 18 قىركۇيەكتە ءانشى گەنناديي گولوۆكين مەن ساۋل الۆارەستىڭ جەكپە-جەگى باستالماس بۇرىن قازاقستاننىڭ ءانۇرانىن ورىنداپ، لاس-ۆەگاستاعى T-Mobile Arena ستاديونىندا قوشەمەتكە بولەندى.
وسى جەكپە-جەگىنەن كەيىن ءانشى گەنناديي گولوۆكيننىڭ قولىن الىپ، قولداۋ ءبىلدىردى.
«ءبىز ءۇشىن سەن چەمپيونسىڭ جانە چەمپيون بولىپ قالا بەرەسىڭ!!! العا قازاقستان!» - دەپ جازدى ءانشى Instagram جەلىسىندەگى رەسمي پاراقشاسىندا.