سەل ءقاۋپى بار كەزەڭدە 19 بەكەت تە جۇمىس ىستەيدى
الماتى ماڭىنداعى ءقاۋىپ ءتوندىرۋى مۇمكىن دەگەن 12 مورەنالىق جانە مۇزدىق كولگە تەكسەرىس جاسالدى، دەپ حابارلايدى Almaty-akshamy.kz Almaty.tv-گە سىلتەمە جاساپ.
جوسپارعا سايكەس ونىڭ جەتەۋىندە بيىل سۋ دەڭگەيىن تەكسەرۋ، ارتىق سۋدى ازايتۋ جۇمىستارى جۇرگىزىلەتىن بولادى. سۋ دەڭگەيىن تەكسەرۋ جۇمىستارى بيىل ادەتتەگىدەن ءبىر ايعا كەش باستالدى. تجد حابارلاۋىنشا، وعان تاۋلى ايماقتاعى اۋا تەمپەراتۋراسىنىڭ تومەن بولۋى سەبەپ. ەندى بۇگىننەن باستاپ قىركۇيەكتىڭ ورتاسىنا دەيىن توتەنشەلىكتەر مەن ارنايى ماماندار بىرىگىپ مۇزدى كولدەردى باقىلاۋدا ۇستاماق.
تىكۇشاق تەڭىز دەڭگەيىنەن 3600 مەتر بيىك جاتقان كول ماڭىنا قوندى. اۋە كولىگىنەن تۇسە سالعاندا ترانسفورماتورعا ۇقسايتىن دۇڭگىرشەكتەر كوزگە تۇسەدى. مامانداردىڭ ايتۋىنشا، بۇل - سەل قاۋىپسىزدىگىن اۆتوماتتى تۇردە باقىلايتىن قۇرىلعى.
«بۇل اپپارات تاۋداعى كولدەردىڭ دەڭگەيىن، سۋ تەمپەراتۋراسىن، مۇزدىقتاردان ەرىپ كەلگەن سۋ شىعىنىن، الماتىداعى ديسپەچەرلىك پۋنكتكە، "قازسەلدەنقورعاۋ" مەكەمەسى جانە تجم-عا سيفرلىق تۇردە اقپارات بەرىپ وتىرادى»، – دەدى «قازسەلدەنقورعاۋ» مم قالالىق باسقارماسىنىڭ باسشىسى سامات داۋلەنحانوۆ.
تاۋ بوكتەرىندە 31 ستانسا بار. ءبىراق سوعان قاراماستان مورەنالىق كولدى باقىلاۋعا ارنايى ماماندار دا جۇمىلدىرىلادى. ال ولار سۋ دەڭگەيىن رەيكامەن ولشەپ وتىرادى.
«رەيكامەن سۋ دەڭگەيىن قاراپ وتىرادى. بۇل قازىق ەمەس، رەيكا. نەگىزى سۋدىڭ دەڭگەيى ءدال ءقازىر قاتتى كوتەرىلە قويماعان. نەگىزى دەڭگەيى 1-2 مەترگە كوتەرىلەدى. ءبىز سونى قاداعالايمىز. كوتەرىلسە سۋدى سيفون قۇبىرلارى ارقىلى تومەن تۇسىرەمىز»، – دەدى «قازسەلدەنقورعاۋ» مم قىزمەتكەرى ۇلان جۇمايەۆ.
سەل ءجۇرۋ ءقاۋپىن بولدىرماس ءۇشىن ورناتىلعان داچيك سۋدىڭ تەمپەراتۋراسىن ولشەيدى.
«قازىرگى كەزدە بۇل جەردە تەمپەراتۋرا 3-4 گرادۋستى عانا قۇراپ وتىر. ءبىز كۇندە قاراپ وتىرمىز. كۇندەلىكتى يزوتەرمانى باقىلاپ وتىرمىز. يزوتەرما - ماڭىزدى قۇرال. ەگەر يزوتەرما 5 مىڭنان جوعارى شىعىپ كەتىپ، ول 10 كۇن ۇستايتىن بولسا سەل ءقاۋپى تونەدى دەگەندى بىلدىرەدى»، – دەدى تجد باستىعىنىڭ ورىنباسارى ەرلان الىبەكوۆ.
تجد وكىلىنىڭ ايتۋىنشا، مورەنالىق كولدەگى سۋدىڭ قازىرگى دەڭگەيى ءقاۋىپ توندىرمەيدى. ءبىراق ماماندار ءتيىستى جۇمىستاردى جوسپارعا ساي جۇرگىزە بەرەدى. سەل ءقاۋپى بار كەزەڭدە 19 بەكەت تە جۇمىس ىستەيدى.