حالىقتىڭ تابىسىن ارتتىرۋ باعدارلاماسىنىڭ جۇرتقا تيگىزگەن پايداسى شامالى – پرەزيدەنت

سوڭعى جىلدارى حالىقتىڭ تابىسى بىرتىندەپ ءوستى

حالىقتىڭ تابىسىن ارتتىرۋ باعدارلاماسىنىڭ جۇرتقا تيگىزگەن پايداسى شامالى. بۇل تۋرالى مەملەكەت باسشىسى قاسىم-جومارت توقايەۆ ۇكىمەتتىڭ كەڭەيتىلگەن وتىرىسى بارىسىندا ايتتى، دەپ حابارلايدى Almaty-akshamy.kz.
كەڭەيتىلگەن وتىرىستا پرەزيدەنت ازاماتتاردىڭ تابىسىن ارتتىرۋ جانە ادام كاپيتالىن دامىتۋ ماسەلەسىنە توقتالدى.

«سوڭعى جىلدارى حالىقتىڭ تابىسى بىرتىندەپ ءوستى. بىلتىر بۇل ءوسىم 5% شاماسىندا بولدى. ءبىراق الماتى، اتىراۋ، قىزىلوردا، ماڭعىستاۋ جانە تۇركىستان وبلىستارىندا جۇرتتىڭ تابىسى ورتاشا رەسپۋبليكالىق دەڭگەيگە جەتپەيدى. بۇل كورسەتكىش الماتى جانە شىمكەنت قالالارىندا دا تومەن. ال، قىزىلوردا وبلىسىندا حالىقتىڭ تابىسى ءتىپتى ازايىپ كەتتى. بيىل مامىر ايىندا ازاماتتاردىڭ ناقتى تابىسىنىڭ كورسەتكىشى مينۋس 2،9 % بولدى. مۇنداي قۇلدىراۋ كوپتەن بەرى بولعان ەمەس»، – دەدى قاسىم-جومارت توقايەۆ.

سونىمەن قاتار ول ازاماتتاردىڭ تابىسىن ارتتىرۋ باعدارلاماسىن پايداسىز دەپ اتادى.

«حالىقتىڭ تابىسىن ارتتىرۋ باعدارلاماسى قابىلداندى. ءبىراق ونىڭ جۇرتقا تيگىزىپ جاتقان پايداسى شامالى. ەڭ الدىمەن، جەرگىلىكتى جەرلەردە ءتيىمدى جۇمىس جۇرگىزىلۋى كەرەك. اكىمدەر جىل سايىن ءاربىر 10 مىڭ تۇرعىنعا 100 جاڭا جۇمىس ورنىن اشۋعا ءتيىس. مەنىڭ بىلۋىمشە، بۇل باعىتتا ناقتى ناتيجە جوق. تاعى دا ەسكەرتەمىن. ءوڭىر باسشىلارىنىڭ جۇمىسىن باعالاعان كەزدە وسى كورسەتكىشكە باسا ءمان بەرەمىز. جۇمىس ورىندارىن اشۋ جۇرتتىڭ الەۋمەتتىك جاعدايىنا تىكەلەي اسەر ەتەدى. ەكونوميكانىڭ تۇراقتى دامۋى دا وسىعان بايلانىستى. سوندىقتان ۇكىمەت اكىمدەرمەن بىرلەسىپ، بۇل مىندەتتىڭ قالاي ورىندالىپ جاتقانىن تالداۋعا ءتيىس»، – دەپ ەسكەرتتى مەملەكەت باسشىسى.