پرەزيدەنتتىڭ قىمباتشىلىق ماسەلەسىنە قاتىستى سىنى ورىندى – ساراپشىلار

ورتاشا دەگەن جاقسى باعا ەمەس

قىمباتشىلىق ماسەلەسىنە قاتىستى پرەزيدەنتتىڭ سىنى ورىندى. وسىلاي دەگەن بەلگىلى ەكونوميست ماقسات حالىق تۇراقتاندىرۋ قورلارىنىڭ جۇمىسىن وزگەرتۋ ماڭىز دەپ اتاپ ءوتتى، دەپ حابارلايدى Almaty-akshamy.kz Almaty.tv-گە سىلتەمە جاساپ.

بۇعان دەيىن ەلدى پاندەميادان شىعارعان تۇراقتاندىرۋ قورلارى دا ءقازىر قوسىمشا قارجى سۇراي باستاعان. ودان الەۋمەتتىك تاۋارلاردىڭ قۇنى ارتپاسا تۇراقتالعان جوق. دەمەك بۇل جەردە دە قارجىنى تالان-تاراجعا سالاتىن بەلگىلى ءبىر سحەمالار پايدا بولعان دەيدى ەكونوميست. ەكونوميست فورۆاردتىق كەلىسىمدەردى جانداندىرۋ، ياعني شارۋالارمەن تىكەلەي بايلانىس بولۋى قىمباتشىلىقتى تەجەيتىنىن ايتتى.

«ۇزاق مەرزىمگە ناقتى شارۋالارمەن، اۋىل شارۋاشىلىق ماماندارىمەن سويلەسۋ كەرەك. ولاردىڭ ناقتى ماسەلەلەرىن ءبىلۋ كەرەك. تۇقىمنىڭ باعاسى قىمباتتاپ كەتكەن. ساپالى تۇقىمداردى جەتكىزىپ بەرۋدى قامتاماسىز ەتۋ كەرەك. شارۋالارعا تومەندەتىلگەن نەسيەلەر مەن تەحنيكالاردى جەتكىزىپ بەرۋ كەرەك. مىنە، وسىنداي ناقتى ماسەلەلەردى جۇزەگە اسىرسا وندا باعالاردىڭ تۇراقتى بولۋىنا اسەر ەتۋگە بولادى»، – دەدى ەكونوميست ماقسات حالىق.

ال بەلگىلى تاريحشى حانكەلدى ءابجانوۆ ۇكىمەتكە وتكىرلىك جەتپەيدى دەيدى. ناقتى ناتيجە شىعارۋ ءۇشىن ۇجىمدارعا بارۋى كەرەك، حالىقپەن ارالاسۋى ءتيىس. سوندا جۇمىس ونەدى دەگەن پىكىردە.

«پرەزيدەنتتىڭ ۇكىمەت قىزمەتىنە ورتاشا دەپ باعا بەرگەنى بۇل ءاليحان سمايىلوۆتى، ءبىزدىڭ مينيسترلەردى قاتتى ويلاندىرۋ كەرەك. ورتاشا دەگەن ول جاقسى باعا ەمەس. ۇلگەرمەيتىن وقۋشىنىڭ دەڭگەيىندە دەگەن ءسوز. مۇنى ۇكىمەت ءتۇسىنۋى كەرەك»، – دەدى تاريح عىلىمدارىنىڭ دوكتورى حانكەلدى ءابجانوۆ.