الماتى اكىم ەربولات دوسايەۆ ق ر پرەزيدەنتى قاسىم-جومارت توقايەۆتىڭ قاتىسۋىمەن وتكەن مەگاپوليستى دامىتۋ جونىندەگى كەڭەستە قالادا ءقاۋىپسىز جانە جايلى ءومىر ءسۇرۋدى قامتاماسىز ەتۋ ءۇشىن زاماناۋي سيفرلىق تەحنولوگيالار بەلسەندى ەنگىزىلىپ جاتقانىن اتادى.
مەملەكەت باسشىسىنىڭ 2022 جىلعى تامىزدا ءبىرىڭعاي بەينەمونيتورينگ جۇيەسىن (بمج) ەنگىزۋ جونىندەگى تاپسىرماسىن ىسكە اسىرۋ ناتيجەسىندە الماتى وسىنداي جۇيە ىسكە قوسىلعان ەلدەگى العاشقى قالا بولدى. ول بەينەدەگى دەرەكتەردى تالداۋ مۇمكىندىگىمەن بىرىكتىرىلەدى. سونىمەن قاتار، 490 الەۋمەتتىك نىساندا (83%) تالشىقتى-وپتيكالىق كابەل تارتۋ جۇمىستارى اياقتالدى، ونىڭ ىشىندە 372 نىساندا بەينەكامەرالار بمج-عا (63%) قوسىلعان، دەدى ەربولات دوسايەۆ.
بۇعان قوسا، بۇگىندە قالالىق پوليسيانىڭ جەدەل باسقارۋ ورتالىعى 18،8 مىڭ بەينەكامەرانى (97%) كورىپ وتىرادى. ءبىلىم بەرۋ نىساندارىندا كەشەندى قاۋىپسىزدىك جۇيەسىن ەنگىزۋ اياقتالعاننان كەيىن الماتى اكىمدىگىنىڭ جوبالىق كەڭسەسى كامەرالاردى 100% قوسادى. سونىمەن بىرگە، الماتى اكىمىنىڭ اقپاراتى بويىنشا قالا تۇرعىندارىنىڭ قاۋىپسىزدىگى ءۇشىن بيىل جىل سوڭىنا دەيىن قالانىڭ 8 اۋدانىندا 35 «دابىل تۇيمەسى» جۇيەسى ورناتىلادى. 2025 جىلدىڭ سوڭىنا دەيىن تاعى 70 «دابىل» تۇيمەسى پايدا بولادى. ال پوليسيانىڭ سەرۆيستىك ۇلگىسىن ىسكە اسىرۋ اياسىندا بيىل جىل سوڭىنا دەيىن قالانىڭ بارلىق اۋدانىندا 8 ورتالىق، 2024 جىلى تاعى 8 ورتالىق ىسكە قوسىلادى.
جالپى، 2023 جىلدىڭ 7 ايىندا قىلمىستىق قۇقىق بۇزۋشىلىقتار 28،7%-عا، جول-كولىك وقيعالارى 24،5%-عا تومەندەگەن.