«ينتەرنەت-الاياقتىق – ميف ەمەس! اباي بول!».
الماتى پوليسياسى ازاماتتاردى قىراعى جانە ساق بولۋعا شاقىرادى، دەپ حابارلايدى Almaty-akshamy.kz Polisia.kz-كە سىلتەمە جاساپ.
الدىن الۋدىڭ ءتيىمدى ادىستەرىنىڭ ءبىرى رەتىندە سىرتقى جارنامانى پايدالانۋ جاتادى. وسىعان وراي، قالا اكىمدىگىنىڭ قولداۋىمەن الماتى كوشەلەرىنە الاياقتاردىڭ قۇربانى بولماۋ تۋرالى كەڭەستەر جازىلعان 20 تاقىرىپتىق اقپاراتتىق باننەرلەر ورناتىلدى. الداعى ۋاقىتتا ەلەكتروندى تاقتالار ارقىلى اقپاراتتاندىرۋدى ىسكە قوسۋ جوسپارلانىپ جاتىر.
«ينتەرنەت جەلىسى كەڭىستىگىندە الاياقتىقتىڭ الدىن الۋ ءۇشىن قالا پوليسەيلەرى ينتەرنەت-الاياقتاردىڭ كوبەيىپ بارا جاتقانىن ەسكەرتەدى. ەسىڭىزدە بولسىن، بانك قىزمەتكەرلەرى ەشقاشان ءسىزدىڭ كارتاڭىزدىڭ دەرەكتەمەلەرىن سۇرامايدى، سونىمەن قاتار تەلەفونىڭىزعا كەلەتىن كىرۋ كودتارىن ايتۋدى تالاپ ەتپەيدى. مۇنداي جاعدايلاردا تەلەفونمەن سويلەسۋدى توقتاتىپ، بانك كارتاسىندا نەمەسە بانكتىڭ سايتىندا كورسەتىلگەن سەنىم تەلەفونىنا قايتا قوڭىراۋ شالۋ كەرەك. كوبىنەسە ەگدە جاستاعى ادامدار قاسكويلەردىڭ تورىنا ءتۇسىپ قالادى»، – دەيدى الماتى قالالىق پوليسيا دەپارتامەنتى باستىعىنىڭ ورىنباسارى ديدار احانوۆ.
الاياقتاردىڭ قۇربانى بولماۋ ءۇشىن بىرنەشە كەڭەس: ەشبىر جاعدايدا بانكتىڭ تەلەفونىڭىزعا جىبەرگەن SMS-كودتارىن، جەكە دەرەكتەرىڭىزدى ەشكىمگە ايتپاڭىز؛ تاۋاردى ساتىپ الۋ نەمەسە قىزمەتتەردى الۋ كەزىندە شەكتەن تىس تاۋەكەلگە بوي الدىرماڭىز، ساتۋشى مەن تاۋاردىڭ ءوزىن كورۋگە تىرىسىڭىز جانە ونىڭ ءقاۋىپسىز ەكەنىنە كوز جەتكىزگەننەن كەيىن عانا تولەم جاساڭىز؛ تولەم كارتالارى مەن جەكە باسىن كۋالاندىراتىن قۇجاتتاردىڭ سۋرەتتەرىن ەشقاشان بوگدە ادامدارعا جىبەرمەڭىز؛ بانك قىزمەتتەرىنە قاتىستى سۇراقتار بويىنشا نومىرلەرى جالپىعا قولجەتىمدى، ونىڭ ىشىندە رەسمي سايتتاردا جاريالانعان بانكتەردىڭ CALL-ورتالىقتارىنا تىكەلەي حابارلاسۋلارىڭىزدى سۇرايمىز؛ ينتەرنەت-الاياقتارىنىڭ قۇربانى بولۋ ءقاۋپى تۋرالى وتباسىڭىز بەن دوستارىڭىزدى ەسكەرتىڭىز. ۇقساس جاعدايلارعا تاپ بولساڭىز، 102 پۋلتىنە نەمەسە جاقىن جەردەگى پوليسيا بولىمىنە حابارلاسىڭىز.