الماتىدا كوممۋنالدىق قىزمەتتەر كومەندانتتىق ساعاتتان باسقا ۋاقىتتاردا شتاتتىق رەجيمدە جۇمىس ىستەپ جاتىر
بۇل تۋرالى قالالىق تۇرعىن ءۇي ساياساتى باسقارماسىنىڭ باسشىسى دانيار قىرىقبايەۆ ايتتى، دەپ حابارلايدى Almaty-akshamy.kz
ونىڭ ايتۋىنشا، 8 قاڭتاردا قوقىس شىعارۋ ۇيىمدارى اۋلا اۋماقتارى مەن جەكە تۇرعىن ۇيلەردەن قاتتى تۇرمىستىق قالدىقتاردى شىعارۋ جۇمىستارىن باستادى.
وعان 200-دەن استام تەحنيكا مەن 700 جۇمىسشى جۇمىلدىرىلدى. قازىرگى جاعداي بويىنشا 10،5 مىڭ توننا قاتتى تۇرمىستىق قالدىق شىعارىلدى.
«9 قاڭتاردان باستاپ «الماتى تازالىق» كاسىپورىن مەن مەردىگەر ۇيىمدار مەگاپوليستىڭ كوشە-جول جەلىسىن تازارتۋ بويىنشا جاپپاي جۇمىستار ۇيىمداستىردى. وعان 500-گە جۋىق ارنايى تەحنيكا مەن 1600 جول جۇمىسشىسى جۇمىلدىرىلدى. بۇگىندە 667 توننا قوقىس شىعارىلدى»، - دەدى سپيكەر.
سونداي-اق قۇتقارۋ قىزمەتىنىڭ 93 جۇمىسشىسىنىڭ كۇشىمەن جانە 45 بىرلىك ارنايى تەحنيكانى قولدانا وتىرىپ، تارتىپسىزدىك بارىسىندا زاقىمدانعان 100 بىرلىك اۆتوكولىك، سونداي-اق ءىرى كولەمدى قوقىس پەن قيراعان ەكوپوستتار شىعارىلدى.