الماتىلىق كاسىپكەرلەرگە الداعى 8 جىلعا مەملەكەتتىك تاپسىرىس ورنىنا ستۋدەنتتەر جاتاقحاناسىن سالۋ ۇسىنىلادى. بۇل ۇسىنىستى ق ر بعم «قارجى ورتالىعى» اق ىلگەرىلەتۋ جانە سىرتقى كوممۋنيكاسيالار دەپارتامەنتىنىڭ ديرەكتورى الپامىس ساتىبالدين وڭىرلىك كوممۋنيكاسيالار قىزمەتىنىڭ باسپا ءسوز كونفەرەنسياسى بارىسىندا ايتتى، دەپ حابارلايدى اlmaty-akshamy.kz
مەحانيزمگە سايكەس، جوو، كوللەدج نەمەسە جەكە كاسىپكەر ستۋدەنتتىك جاتاقحانا ءۇشىن عيمارات سالىپ نەمەسە قايتا قۇرا الادى جانە وبەكت پايدالانۋعا بەرىلگەننەن كەيىن وتەماقى الا الادى. 2022 جىلى ەلىمىز بويىنشا 11 057 ورىندى 32 جاتاقحانانى پايدالانۋعا بەرۋ جوسپارلانىپ وتىر. الپامىس ساتىبالدين كەز كەلگەن الەۋمەتتىك نىساننىڭ قۇرىلىسى تابىستى، تۇراقتى عانا ەمەس، سونداي-اق پەرسپەكتيۆالى بيزنەس-جوبا ەكەنىن اتاپ ءوتتى.
مەملەكەتتىك تاپسىرىستى ورنالاستىرۋدىڭ باستى شارتى ستۋدەنتتىڭ تۇرۋ فاكتىسى بولىپ تابىلادى. ياعني جان باسىنا قارجىلاندىرۋ قاعيداتى جۇمىس ىستەيدى. مەملەكەتتىك تاپسىرىس مەملەكەتتىك مەكەمەلەردى قوسپاعاندا، بارلىق ۇيىمداردا ورنالاستىرىلادى.
ءبىر ستۋدەنتكە مەملەكەتتىك تاپسىرىستىڭ جىل سايىنعى مولشەرى: قۇرىلىس كەزىندە 122 اەك (الماتى قالاسىندا – 144 اەك)، قايتا جاڭارتۋ كەزىندە - 47 اەك (نۇر-سۇلتان جانە الماتى قالالارى ءۇشىن 92 اەك) قۇرايدى. بۇل رەتتە العاشقى 12 ايدا مەملەكەتتىك تاپسىرىس ەكىگە تەڭ تۇزەتۋ كوەففيسيەنتىن ەسكەرە وتىرىپ تولەنەدى. مىسالى، ءىس جۇزىندە 100 ادام تۇرادى، تولەمدەر 200 ادامعا تولەنەدى، ءبىراق جاتاقحانانىڭ جوبالىق قۋاتىنان اسپايدى. وسى ماقساتتا رەسپۋبليكالىق بيۋدجەتتە 152 ملرد تەڭگە قاراستىرىلعان.
«مەملەكەتتەن تولەۋ مەرزىمى وتكەننەن كەيىن وبەكت قۇرىلىس سالۋشىنىڭ مەنشىگىندە قالادى. وبەكتىنىڭ نىسانالى ماقساتىن وزگەرتۋگە اۋىرتپالىقتى 20 جىل مەرزىمگە تىركەۋ جالعىز شارت بولادى. بۇل جوباعا قاتىسۋ – بيزنەس ءۇشىن ينۆەستيسيالار تۇرعىسىنان ءتيىمدى ۇسىنىس قانا ەمەس، سونىمەن قاتار وتاندىق ءبىلىم بەرۋ دەڭگەيىن جاقسارتۋعا ءوز ۇلەسىن قوسۋ مۇمكىندىگى»، - دەپ حابارلادى سپيكەر.
الپامىس ساتىبالدين اتاعان تاعى ءبىر ارتىقشىلىق - مەملەكەتتىك تاپسىرىستى ورنالاستىرۋمەن قاتار مەنشىك يەسىنىڭ قوسىمشا تابىس كوزدەرى دە بولادى. وسىلايشا، ستۋدەنتتەردىڭ تۇرۋ ءۇشىن اي سايىنعى تولەمى مەملەكەتتىك تاپسىرىس قۇنىنا كىرمەيدى. ونىڭ مولشەرىن جاتاقحانا يەسى رەتتەيدى جانە بەلگىلى ءبىر ايماقتىڭ تۇرعىن ءۇي نارىعىنىڭ جاعدايىمەن انىقتالادى.
سونداي-اق، كاسىپكەر تۇرمىستىق قىزمەت كورسەتۋ ءۇشىن كوممەرسيالىق الاڭدار جاساي الادى، ولاردىڭ نەگىزگى تۇتىنۋشىلارى تۇرعىندار بولادى (اسحانا، شاشتاراز، ترەناجەر زالى جانە تاعى باسقالار).
بۇگىندە ارالىق ناتيجەلەر بار – 30 630 ورىندىق 124 جاتاقحانا پايدالانۋعا بەرىلدى.