جەتىسايلىق شارۋالار قاۋىن ەكسپورتىن باستاپ كەتتى. العاشقى ءونىم رەسەيدىڭ ماسكەۋ قالاسىنا جونەلتىلۋدە، دەپ حابارلايدى almaty-akshamy.kz
بۇگىندە جەتىساي توپىراعىنا ەگىلگەن قاۋىن داقىلدارىنىڭ العاشقى لەگى ءپىسىپ ۇلگەردى. ءقازىر ديقاندار ەگىستىك القابىنان تەرىپ العان ونىمدەرىن ەكسپورتقا دايىنداپ جاتىر. جەرگىلىكتى تۇرعىن ءال-فارابي كۇزەنبايەۆ، بىرنەشە جىلدان بەرى ديقانشىلىقپەن اينالىسىپ جۇرگەن شارۋا، اباي اۋىلدىق وكرۋگىندەگى 45 گەكتار جەرىنە ەرتە كوكتەمدە ەگىن ەككەن بولاتىن.
«اقپان ايىندا وتىرعىزىلعان قاۋىننىڭ «باكينكا» سورتى جوسپارداعى 65 كۇندە ەمەس، اۋا رايىنىڭ جاۋىن-شاشىندى بولۋى سالدارىنان 90 كۇندە جەۋگە جارامدى بولدى. ەندى سۇرانىسقا سايكەس رەسەي فەدەراسياسىنىڭ ماسكەۋ قالاسىنا ەكسپورتتاپ جاتىرمىز. بيىل قاۋىنىمىز جىلداعىدان ءسال كەشتەۋ ءپىستى. سۇرانىس تا جاقسى. اعىن سۋدان قيىنشىلىقتار بولعانىمەن، تاپشىلىق سەزىلمەدى. باعا جامان ەمەس، كەلىسى 600 تەڭگەدەن بولىپ جاتىر. ەشقانداي دەلدالسىز ءونىمدى ەگىستىك باسىنان ءوزىمىز كولىكتەرگە تيەپ، جىبەرىپ جاتىرمىز»، - دەيدى «ءال-فارابي» شارۋا قوجالىعىنىڭ ءتوراعاسى ءال-فارابي كۇزەنبايەۆ.
ايتا كەتەيىك، بيىل اۋدانداعى سۋارمالى جەردىڭ 20 مىڭ گەكتارىنا ەگىلگەن باقشا داقىلدارىنىڭ 16 مىڭ گەكتارى قاۋىن بولسا، 4 مىڭ گەكتارى قاربىز داقىلى. وتكەن جىلى 18 780 گەكتار القاپقا ەگىلگەن باقشانىڭ 14 مىڭ گەكتارى قاۋىن، 4،6 مىڭ گەكتارى قاربىز بولعان. ال جالپى الىنعان ءونىم كولەمى – 514،3 مىڭ توننا.