الماتى كىتاپحانالارىندا تۇرىك، اعىلشىن، نەمىس، فرانسۋز جانە جۇڭگو تىلدەرىن تەگىن وقىپ ۇيرەنۋگە بولادى، دەپ حابارلايدى almaty-akshamy.kz
مۇنداي ەرەكشە مۇمكىندىككە كىتاپ الەمىنىڭ اۋەسقويلارى - بالالار دا، ەرەسەكتەر دە يە. ءتىل ۇيرەنۋگە نيەت بىلدىرگەندەرگە ساباقتى ۋنيۆەرسيتەت وقىتۋشىلارى، ەلشىلىك وكىلدەرى مەن ەرىكتىلەر جۇرگىزەدى. مادەنيەت باسقارماسى قالا كىتاپحانالارى كىتاپ وقۋعا دەگەن قىزىعۋشىلىقتى وياتۋ جانە كەلۋشىلەردىڭ تانىمدىق ىس-ارەكەتىن ىنتالاندىرۋ ءۇشىن بەلسەندى جۇمىس ىستەپ جاتقانىن اتاپ ءوتتى.
«ءبىز قوعامنىڭ جان-جاقتى دامۋىنا جانە مادەنيەتارالىق تۇسىنىستىكتى نىعايتۋعا ىقپال ەتەتىن شىعارماشىلىق باستامالاردى بەلسەندى قولدايمىز. ماماندار وقىرماندار ءۇشىن ادەبي ۆيكتورينالار، اۆتورلارمەن كەزدەسۋلەر، ءتۇرلى تاقىرىپتىق بايقاۋلار وتكىزىپ قانا قويماي، كىتاپ جانە ءتىل ۇيىرمەلەرىن ۇيىمداستىرىپ ءجۇر. ايتا كەتەرلىگى، 4000-عا جۋىق ادام شەتەل ءتىلى كۋرستارىنان وتكەن، بۇل نەگىزىنەن 5 جاستان 17 جاسقا دەيىنگى بالالر. وسىلايشا، ءبىز وسكەلەڭ ۇرپاقتىڭ كىتاپ وقۋعا دەگەن قىزىعۋشىلىعىن ارتتىرۋعا بايلانىستى مەملەكەت باسشىسى مىندەتتەگەن تاپسىرمانى ورىنداپ جاتىرمىز. جالپى كىتاپحانالاردا سيفرلاندىرۋ، كىتاپ قورىن جاڭارتۋ بويىنشا جۇمىستار جۇرگىزىلۋدە جانە بۇل ماسەلەلەر قالا اكىمىنىڭ ەرەكشە باقىلاۋىندا»، – دەدى الماتى قالاسى مادەنيەت باسقارماسىنىڭ باسشىسى عاني مايلىبايەۆ.
ءقازىر مەكتەپ جاسىنا دەيىنگى بالالار دا اتا-انالارىمەن بىرگە «Onay English»، «English for children»، «Mama&me» جانە «Read-ka» جوبالارىنا قاتىسۋدا. ايتا كەتەرلىگى، الماتى كىتاپحانالارى قازاق ءتىلىن ۇيرەنەمىن جانە جەتىلدىرەمىن دەيتىن وقىرماندار ءۇشىن دە قولايلى جاعداي جاساعان: قازاق تىلىندە كوركەم جازۋ، دۇرىس سويلەۋ جانە شەشەندىك ونەرگە باۋلۋعا باعىتتالعان جوبالار جۇزەگە اسۋدا.
كىتاپحانالار جەلىسى ۇسىنعان جاڭالىقتاردان شەت قالماۋ جانە ءتىل كۋرستارىنا قاتىستى قوسىمشا اقپارات الۋ ءۇشىن قالا كىتاپحانالارىنىڭ Instagram-داعى رەسمي پاراقشاسىنا @library.almaty جازىلۋعا شاقىرامىز.
انىقتاما ءۇشىن: الماتىدا 28 قالالىق كىتاپحانا جۇمىس ىستەيدى. ولار – جامبىل اتىنداعى قالالىق جاسوسپىرىمدەر كىتاپحاناسى، ALATAU CREATIVE HUB، ا.پ. چەحوۆ اتىنداعى ورتالىق قالالىق كىتاپحانا، وتباسىلىق وقۋ كىتاپحاناسى، المالى كىتاپحاناسى، ي.ا. كرىلوۆ اتىنداعى قالالىق بالالار كىتاپحاناسى، س.بەگالين اتىنداعى ورتالىق قالالىق بالالار كىتاپحاناسى، №45 فيليال، №44 فيليال، №39 بالالار كىتاپحانا بولىمشەسى، №33 بالالار كىتاپحانا بولىمشەسى، № 32 كوپشىلىك كىتاپحانا، №31 كوپشىلىك كىتاپحانا، №30 بالالار كىتاپحاناسى، №29 بالالار كىتاپحانا بولىمشەسى، №26 كىتاپحانا بولىمشەسى، №24 بالالار كىتاپحانا بولىمشەسى، № 20 كىتاپحانا بولىمشەسى، №15 كىتاپحانا بولىمشەسى، №14 كىتاپحانا بولىمشەسى، №6 كىتاپحانا بولىمشەسى، №4 كىتاپحانا بولىمشەسى، قازاقستان جازۋشىلار كىتاپحاناسى، №1 بالالار كىتاپحانا بولىمشەسى. تىزىمدەگى العاشقى ەكى كىتاپحانا تاۋلىك بويى جۇمىس ىستەيدى.