الماتى كەدەنىندە زاڭسىز دارى-دارمەك پارتياسى انىقتالدى

دارى-دارمەك ءۇندىستاننان اكەلىنگەن.

الماتىداعى "جەتىسۋ" كەدەن بەكەتىندە كەدەندىك تەكسەرۋ بارىسىندا ءۇندىستاننان زاڭسىز اكەلىنگەن دارى-دارمەك پارتياسىنىڭ جولى كەسىلدى، دەپ حابارلايدى Almaty-akshamy.kz قالالىق مەملەكەتتىك كىرىستەر دەپارتامەنتىنىڭ باسپا ءسوز قىزمەتىنە سىلتەمە جاساپ.

"تاعامعا بيولوگيالىق بەلسەندى قوسپا" دەگەن اتپەن تازا سالماعى 356 كەلى بولاتىن 54 449 دانا دايىن دارىلىك زاتتاردىڭ پارتياسىن (تابلەتكا تۇرىندە) ەلگە كىرگىزۋگە تىرىسقان"، - دەلىنگەن باسپا ءسوز قىزمەتى تاراتقان اقپاراتتا.

كەدەندىك ساراپتاما ناتيجەسىندە تاۋار "دارىلىك زات" ەكەنى جانە تەراپيەۆتىك ماقساتتاردا پايدالانۋعا ارنالعانى انىقتالدى. ول دوزالانعان دارىلىك فورمادا بولشەك ساۋداعا ارنالىپ ورالعان.

"جۇرگىزىلگەن ەسەپتەۋلەرگە سايكەس، تاۋاردىڭ كەدەندىك قۇنى 43،4 ميلليون تەڭگەنى، ال بيۋدجەتكە كەلتىرىلگەن شىعىن سوماسى 5،2 ميلليون تەڭگەنى قۇرادى. سىرتقى ەكونوميكالىق قىزمەتكە قاتىسۋشىنىڭ ىس-ارەكەتىنەن قىلمىستىق كودەكستىڭ 234-بابىندا كوزدەلگەن "ەكونوميكالىق كونتراباندا" زاڭبۇزۋشىلىق بەلگىلەرى بايقالادى. وسىعان بايلانىستى ماتەريال شەشىم قابىلداۋ ءۇشىن الماتى قالاسى بويىنشا ەكونوميكالىق تەرگەۋ دەپارتامەنتىنە جىبەرىلدى"، - دەلىنگەن حابارلامادا.

جالپى، جىل باسىنان بەرى دەپارتامەنت كەدەندىك تەكسەرۋ ناتيجەلەرى بويىنشا كەدەن زاڭناماسىن بۇزۋدىڭ 780 فاكتىسىن انىقتاعان. ايىپپۇل سوماسى 6،4 ميلليون تەڭگەنى قۇرادى، قوسىمشا 82،2 ميلليون تەڭگەگە كەدەندىك تولەمدەر مەن سالىقتار ەسەپتەلىپ، ءوندىرىلدى.

مكد "قازاقستان رەسپۋبليكاسىنداعى كەدەندىك رەتتەۋ تۋرالى" كودەكستىڭ 34-بابى 1-تارماعىنا سايكەس، ەۋرازيالىق ەكونوميكالىق وداقتىڭ كەدەندىك اۋماعىنا اكەلىنەتىن تاۋارلار وداقتىڭ كەدەندىك شەكاراسىنان وتكەن كەزدەن باستاپ كەدەندىك باقىلاۋدا بولاتىنىن ەسكە سالادى.