قورعالعان مۇلىكتىك قۇقىقتاردىڭ سوماسى 10 ملرد تەڭگەدەن استى.
بۇل تۋرالى الماتى قالاسى كاسىپكەرلەر پالاتاسىنىڭ ديرەكتورى ايتۋار قوشمامبەتوۆ مالىمدەدى. ول وڭىرلىك كوممۋنيكاسيالار قىزمەتى الاڭىندا ءسوز سويلەپ، 2021 جىلدىڭ قورىتىندىسىن شىعاردى، دەپ حابارلايدى Almaty-akshamy.kz
ايتۋار قوشمامبەتوۆتىڭ ايتۋىنشا، بيىل 546 ءوتىنىش كەلىپ تۇسكەن، ونىڭ ىشىندە 236-سى بويىنشا كونسۋلتاتيۆتىك-قۇقىقتىق كومەك، 310-ى بويىنشا پروبلەمالىق ماسەلەلەردى شەشۋگە كومەك كورسەتىلگەن. قورعالعان مۇلىكتىك قۇقىقتاردىڭ سوماسى 10 ملرد تەڭگەدەن استى.
ادەتتە وتىنىشتەردىڭ باسىم بولىگى سالىق سالۋ ماسەلەلەرى بويىنشا تۇسەدى، سونداي-اق مەملەكەتتىك ورگاندارعا شاعىمدار، Ashyq جوباسى بويىنشا وبەكتىلەردى اشۋ ماسەلەلەرى بولدى.
ەڭ وتكىر ماسەلەلەر كاسىپكەرلەردىڭ قۇقىقتارىن قورعاۋ جانە سىبايلاس جەمقورلىققا قارسى ءىس-قيمىل جونىندەگى كەڭەستىڭ 10 وتىرىسىندا قارالدى. سونىمەن قاتار، ايتىلعان ماسەلەلەر راستالدى، ال مەملەكەتتىك ورگاندار كەڭەس ۇسىنىستارىمەن كەلىستى. جۇرگىزىلگەن تەكسەرۋلەر ناتيجەسىندە مەملەكەتتىك ورگانداردىڭ 7 لاۋازىمدى تۇلعاسى تارتىپتىك جاۋاپكەرشىلىككە تارتىلدى، جەرگىلىكتى پوليسيا قىزمەتىنىڭ ەكى قىزمەتكەرى لاۋازىمدىق وكىلەتتىكتەرىن اسىرا پايدالانعانى ءۇشىن جۇمىستان شىعارىلدى.
«ءبىزدىڭ ساراپشىلار 83 ازاماتتىق جانە اكىمشىلىك ىستەر بويىنشا ءتۇرلى سوت ينستانسيالارىنا قاتىسىپ، كاسىپكەرلەردىڭ قۇقىقتارىن قورعادى. بيزنەس مۇددەلەرىن قورعاۋدىڭ تاعى ءبىر مىسالى رەسپۋبليكالىق جانە ايماقتىق نورماتيۆتىك-قۇقىقتىق اكتىلەرگە ساراپتاما جۇرگىزۋ بولىپ تابىلادى»، - دەدى الماتى كاسىپكەرلەر پالاتاسىنىڭ ديرەكتورى.
پالاتا قىزمەتى باعىتتارىنىڭ ءبىرى اكىمشىلىك كەدەرگىلەردى جويۋ بولىپ تابىلادى. ماسەلەن، پالاتا وسىنداي 31 فاكتىنى انىقتادى.
«ەگەر جاعىمدى كەيستەر تۋرالى ايتاتىن بولساق، پالاتانىڭ الماتى قالاسى بويىنشا مكد-عا جۇگىنۋىنىڭ ارقاسىندا ق ر قم مەملەكەتتىك كىرىستەر كوميتەتىنىڭ اقپاراتتىق جۇيەلەرى اراسىندا حابارلامالارمەن الماسۋدىڭ تەحنيكالىق پروبلەماسى جويىلدى. وسى ماسەلەگە بايلانىستى كاسىپكەرلەر قارىزىنىڭ جوقتىعى تۋرالى انىقتاما الا المادى»، - دەپ اتاپ ءوتتى ا. قوشمامبەتوۆ.
سونداي-اق، قۇقىقتىق بلوك ساراپشىلارى تۇراقتى ەمەس جولاۋشىلار تاسىمالى (تۋريستىك جانە بالالار اۆتوبۋستارى) سالاسىندا جۇمىس ىستەيتىن 25 كاسىپكەرگە كومەك كورسەتتى. پالاتا ولارعا اۆتوبۋس جولاعىندا جۇرۋگە رۇقسات الۋعا كومەكتەستى.
بۇدان باسقا، الماتى سەرىكتەستىگىنە كومەك كورسەتىلدى، وعان اۋماقتى جانە جازعى الاڭدى اباتتاندىرۋ ءۇشىن نىسانالى ماقساتى بار جەر ۋچاسكەسىن جالعا الۋدى ۇزارتۋعا 4 رەت رۇقسات بەرىلمەدى. كاسىپكەر جوعارعى سوتتا سوت داۋلارىنان ايىرىلدى، ءبىراق پالاتا ارالاسقاننان كەيىن ماسەلە بيزنەس سۋبەكتىسىنىڭ پايداسىنا شەشىلدى.