قازاقستاندا ەپيداحۋال ءبىرشاما تۇراقتانعانداي، ەلىمىز «قىزىل» ايماقتان تۇگەلىمەن شىقتى. ال كوۆيدتىك جاعدايداعى الەمنىڭ احۋالى قانداي؟
ەۋروپالىق وداق ەلدەرىنىڭ ۇكىمەتتەرى «وميكرون» شتامىنىڭ تەز تارالۋىنا بايلانىستى شەكتەۋ شارالارىن ەنگىزۋدە، دەپ حابارلايدى Almaty-akshamy.kz Covid-19 تارالۋىنا جول بەرمەۋ جونىندەگى ۆاك-تىڭ تەلەگرام كانالىنا سىلتەمە جاساپ.
افريكانىڭ ەڭ تىعىز قونىستانعان ەلىنىڭ ءبىرى - نيگەريا بيلىگى covid-19 اۋرۋىنىڭ ءتورتىنشى تولقىنىن جاريالادى جانە اۋرۋدىڭ ءوسۋىن «دەلتا» جانە «وميكرون» شتامدارىنىڭ تارالۋىمەن بايلانىستىردى. اۋرۋلاردى باقىلاۋ ورتالىعىنىڭ باسشىسى يفەدايو ادەتيفانىڭ مالىمدەمەسىندە ايتىلعانداي، سوڭعى ەكى اپتادا اۋرۋدىڭ ايتارلىقتاي ءوسۋى بايقالدى-شامامەن 500 %. نيگەريانىڭ 36 شتاتى مەن فەدەرالدى استانالىق وكرۋگىندە 223 887 جاڭا جاعداي جانە 2 985 ءولىم دەرەكتەرى تىركەلدى. ءقازىر ەل ۇكىمەتى كۆي-عا قارسى كۇرەستە كۇش-جىگەردى جانە حالىقتى ۆاكسيناسيا تۋرالى حاباردار ەتۋ، سونداي-اق ۆيرۋستىڭ تارالۋىن ازايتۋ ءۇشىن قاۋىپسىزدىك شارالارىن ساقتاۋ جونىندەگى جۇمىستى جانداندىرۋدا.
ەۋروپالىق وداق ەلدەرىنىڭ ۇكىمەتتەرى «وميكرون» شتامىنىڭ تەز تارالۋىنا بايلانىستى شەكتەۋ شارالارىن ەنگىزۋدە. ەڭ ماڭىزدى ستاتيستيكا ۇلىبريتانيادا، اتاپ ايتقاندا، استاناسى لوندوندا بايقالادى – كۇنىنە شامامەن 25 مىڭ ينفەكسيا جۇقتىرۋ دەرەكتەرى انىقتالۋدا. ۇلىبريتانيا استاناسىنىڭ مەرى سادىق حان قالادا توتەنشە جاعداي رەجيمىن ەنگىزدى. وسى ۋاقىتتا فرانسيا مەن گەرمانيا بريتاندىقتاردىڭ ءوز مەملەكەتتەرىنە كىرۋىنە تىيىم سالدى، ال نيدەرلاندى ولار ءۇشىن مىندەتتى ون كۇندىك كارانتين ەنگىزدى. بۇگىنگى تاڭدا ۇلىبريتانيا ازاماتتارى ءۇشىن 40-تان استام ەل جابىلدى.
اقش-تا «وميكرون» شتامىن جۇقتىرعانداردىڭ سانى ەكى كۇن سايىن ەسەلەپ ارتۋدا. اقش ۇلتتىق اللەرگيالىق جانە جۇقپالى اۋرۋلار ينستيتۋتىنىڭ ديرەكتورى ەنتوني فاۋكيدىڭ ايتۋىنشا، «وميكرون» شتامىن جۇقتىرۋ سانى ءبىر اپتادا 8-10%-دان 73% - عا دەيىن ءوستى.
گەرمانيا تۇرعىندارىنا پاندەمياعا بايلانىستى قارىم-قاتىناستى مۇمكىندىگىنشە شەكتەۋ ۇسىنىلدى. 28 جەلتوقساننان باستاپ جەكە كەزدەسۋلەرگە ەڭ كوپ دەگەندە 10 ادام قاتىسا الادى دەپ كۇتىلۋدە. ۆاكسيناسيالانباعان ادامدار تەك بىرگە تۇراتىن ادامدارمەن ارالاسا الادى. سونىمەن قاتار تۇنگى كلۋبتار مەن ديسكوتەكالار جابىلادى دەپ كۇتىلۋدە.
تايلاند پحۋكەتتەن باسقا ساياحاتتاۋعا بولاتىن بارلىق پروۆينسيانى شەتەلدىك تۋريستەر ءۇشىن ۋاقىتشا جاۋىپ تاستادى. ەل بيلىگى بارلىق كەلۋشىلەر ءۇشىن مىندەتتى كارانتين ەنگىزۋدى قايتا قاراستىرۋدا.
ۇحل ويىن ماۋسىمىن ۋاقىتشا توقتاتۋ تۋرالى جاريالادى. ليگادا مۇنداي شەشىم كوروناۆيرۋستى جۇقتىرعان ويىنشىلار مەن كلۋب قىزمەتكەرلەرى سانىنىڭ كۇرت ءوسۋى جانە 50-گە جۋىق تۇراقتى چەمپيونات ويىندارىن ماجبۇرلەپ كوشىرۋ اياسىندا قابىلداندى.