«دامۋ» قورى ءبىرىڭعاي شارتتارمەن جانە كەپىلدىكتەرمەن بيزنەستى قولداۋدىڭ جاڭا شارالارىن ۇسىندى
الماتى قالاسىنىڭ وڭىرلىك كوممۋنيكاسيالار قىزمەتىنىڭ الاڭىندا وتكەن باسپا ءسوز كونفەرەنسياسى بارىسىندا «دامۋ» قورى فيليالىنىڭ ديرەكتورى جاندوس نۇرعازينوۆ مەملەكەتتىك قولداۋدىڭ جاڭا شارالارىن تانىستىردى، دەپ حابارلايدى aqshamnews.kz.
بۇل شارالار قارجىلاندىرۋدىڭ قولجەتىمدىلىگىن كەڭەيتۋگە جانە شاعىن بيزنەستەن باستاپ ءىرى كومپانيالارعا دەيىنگى بيزنەستىڭ بارلىق ساناتتارى ءۇشىن جاعدايلاردى جەڭىلدەتۋگە باعىتتالعان.
2024 جىلدان باستاپ قور نارىعى مەن الەۋمەتتىك كاسىپكەرلىكتى دامىتۋ ءۇشىن ميكروبيزنەستى، شوب پەن ءىرى بيزنەستى قامتيتىن ءبىرىڭعاي كەشەندى باعدارلاما جۇمىس ىستەيدى. ءار باعىتتىڭ باسىم سالالارى، كرەديتتەر بويىنشا ليميتتەرى جانە 7% - دان 10% - عا دەيىنگى سارالانعان پايىزدىق مولشەرلەمەلەرى بولادى.
«قازىرگى ۋاقىتتا مەملەكەتتىك قولداۋ شارالارىن كەڭەيتۋ جوسپارلانۋدا، ونىڭ ىشىندە تۇپكىلىكتى قارىز الۋشى ءۇشىن 12،6% دەڭگەيىندە ءبىرىڭعاي ءتيىمدى مولشەرلەمە بەلگىلەۋ كوزدەلىپ وتىر. بۇل شارا بيزنەسكە سەرپىن بەرۋگە، ناقتى سەكتور كاسىپورىندارىنا قارجىلاندىرۋ نارىعىن بۇرمالاماي، ءادىل مولشەرلەمە ۇسىنۋعا، سونداي-اق بيۋدجەتكە تۇسەتىن جۇكتەمەنى ازايتىپ، سۋبسيديالاۋ تاجىريبەسىنەن بىرتىندەپ باس تارتۋعا باعىتتالعان»، – دەدى ج. نۇرعازينوۆ.
بۇعان قوسا، مەملەكەت باسشىسىنىڭ تاپسىرماسى اياسىندا ۇكىمەتپەن، ەكىنشى دەڭگەيلى بانكتەرمەن جانە باسقا دا ينۆەستورلارمەن بىرلەسىپ، شوب پەن ءىرى بيزنەس جوبالارىن نەسيەلەۋ ءۇشىن كەپىلدىك بەرۋ قورلارى ىسكە قوسىلدى.
كەپىلدىك بەرۋ قورلارى شاعىن جانە ورتا بيزنەسكە (شوب) كەلەسى شارتتارمەن قولداۋ كورسەتەدى:
نەسيە سوماسى 7 ملرد تەڭگەگە دەيىن؛
كەپىلدىك مولشەرى نەسيە سوماسىنىڭ 85%-ىنا دەيىن، ءبىراق 3،5 ملرد تەڭگەدەن اسپايدى؛
كەپىلدىك مەرزىمى - قارجىلاندىرۋ مەرزىمىمەن شەكتەلەدى؛
كەپىلدىك قۇنى - جىلدىق 1،5%.
ءىرى بيزنەس جوبالارى ءۇشىن ۇسىنىلاتىن شارتتار:
نەسيە سوماسى 7 ملرد تەڭگەدەن جوعارى؛
باستاماشىنىڭ قاتىسۋى - جوبا قۇنىنىڭ كەمىندە 20%-ى؛
كەپىلدىك مولشەرى 30%-عا دەيىن؛
كەپىلدىك مەرزىمى 15 جىلعا دەيىن؛
كەپىلدىك قۇنى - جىلدىق 2%.
«كەپىلدىك قايتارىمسىزدىق پەن شارتسىزدىق قاعيداتتارى بويىنشا ۇسىنىلاتىن بولادى، بۇل قارجى ۇيىمدارى ءۇشىن قۇرالدى تارتىمدى ەتەدى»، – دەپ اتاپ ءوتتى سپيكەر.
بۇگىنگى تاڭدا «دامۋ» قورىنا بارلىق وتىنىمدەر ونلاين-رەجيمدە قابىلدانادى. 2019 جىلى Online-Damu جەكە سيفرلىق پلاتفورماسى ىسكە قوسىلدى، سونىڭ ارقاسىندا ىشكى پروسەستەردى اۆتوماتتاندىرۋعا جانە جەدەلدىكتى ەداۋىر ارتتىرۋعا مۇمكىندىك تۋدى. ناتيجەسىندە وتىنىمدەردى قاراۋ مەرزىمى 21-دەن 5 جۇمىس كۇنىنە دەيىن قىسقاردى.
«دامۋ» قورى قازاقستاننىڭ كاسىپكەرلىك ەكوجۇيەسىن دامىتۋدا ماڭىزدى ءرول اتقارادى. ونىڭ مىندەتى – قارجىلىق جانە قارجىلىق ەمەس قولداۋ قۇرالدارىن ۇسىنۋ عانا ەمەس، سونىمەن قاتار بيزنەستى بارلىق كەزەڭدەردە – ميكرودان باستاپ ءىرى كومپانيالارعا دەيىن كەشەندى سۇيەمەلدەۋ. مۇنداي قولداۋ جۇمىس ورىندارىن قۇرۋعا، قولايلى بيزنەس-ورتانى دامىتۋعا جانە ەل ەكونوميكاسىن ءارتاراپتاندىرۋعا ىقپال ەتەدى»، – دەپ اتاپ ءوتتى ج. نۇرعازينوۆ.