الماتىنىڭ وڭىرلىك كوممۋنيكاسيالار قىزمەتىندە وتكەن باسپا ءسوز كونفەرەنسياسىندا «دامۋ» كاسىپكەرلىكتى دامىتۋ قورى فيليالىنىڭ ديرەكتورى جاندوس نۇرعازينوۆ جۇمىس قورىتىندىلارى مەن مەگاپوليس كاسىپكەرلەرى ءۇشىن جاڭا قولداۋ شارالارى جايىندا ايتىپ ءوتتى، دەپ حابارلايدى aqshamnews.kz.
ونىڭ ايتۋىنشا، قىزمەت باستالعاننان بەرى قور جالپى سوماسى 2،2 ترلن تەڭگەگە 20،4 مىڭنان استام جوباعا قولداۋ كورسەتتى، ونىڭ 85% - ى ميكرو جانە شاعىن بيزنەسكە تيەسىلى.
«قور قولداعان كاسىپورىندار بۇكىل كەزەڭ ىشىندە 16 619،9 ملرد تەڭگەگە ءونىم ءوندىرىپ، ال تولەنگەن سالىق كولەمى 1 242،5 ملرد تەڭگەنى قۇرادى. 140 مىڭنان استام جۇمىس ورنى ساقتالىپ، جاڭادان اشىلدى. وسىلايشا، سالىنعان ءاربىر 1 تەڭگە 5 تەڭگە مولشەرىندە سالىق رەتىندە قايتارىلادى»، – دەپ اتاپ ءوتتى ج. نۇرعازينوۆ.
قالا اكىمدىگىمەن بىرلەسىپ ىسكە اسىرىلاتىن «Almaty Business/Jana Business» باعدارلاماسىنا ەرەكشە نازار اۋدارىلدى. باعدارلاما اياسىندا شوب وكىلدەرىنە جىلدىق 7% مولشەرلەمەمەن، 7 جىلعا دەيىنگى مەرزىمگە جانە 100 ملن تەڭگەگە دەيىنگى سوماعا نەسيە بەرۋ ۇسىنىلادى. 2015 جىلدان باستاپ باعدارلاماعا 32،5 ملرد تەڭگە باعىتتالدى، ال اعىمداعى جىلى تاعى 3 ملرد تەڭگە ءبولۋ جوسپارلانۋدا.
باعدارلاما اياسىندا 852 كاسىپكەرگە قولداۋ كورسەتىلىپ، جالپى سوماسى 124،9 ملرد تەڭگەگە نەسيە بەرىلدى. سونىڭ ناتيجەسىندە 1 214 ملرد تەڭگەنىڭ ءونىمى ءوندىرىلىپ، بيۋدجەتكە 100،7 ملرد تەڭگە سالىق ءتۇستى.
نۇرعازينوۆ كاسىپكەرلەرمەن «دامۋ» قورىنان قولداۋ الۋ تۋرالى كەڭەستەرىمەن ءبولىستى.
«قور شاعىن جانە ورتا كاسىپكەرلىك سۋبەكتىلەرىن قولداۋعا باعىتتالعان ءبىرقاتار قۇرالداردى ۇسىنادى. ولاردىڭ قاتارىندا باسىم باعىتتار بويىنشا 200 ملن تەڭگەگە دەيىنگى نەسيەلەرگە پايىزدىق مولشەرلەمەنى سۋبسيديالاۋ، كەپىلدىك بەرۋ، جەڭىلدەتىلگەن نەسيەلەۋ جانە جوبالاردىڭ تيىمدىلىگىن باقىلاۋ بار. قولداۋ الۋ ءۇشىن كاسىپكەر بانككە ءوتىنىم تاپسىرىپ، ماقۇلداۋدان ءوتىپ، قاجەتتى قۇجاتتاردى «دامۋ» قورىنا ۇسىنادى. كەيىن بانكپەن جانە قور وكىلدەرىمەن ءۇشجاقتى كەلىسىمشارتقا قول قويىلادى»، – دەپ تۇيىندەدى ول.