2025–2026 جىلعى جىلىتۋ ماۋسىمىنا دايارلىق اياسىندا الماتىدا ءورت قاۋىپسىزدىگىن قامتاماسىز ەتۋ مەن وقىس وقيعانىڭ سانىن ازايتۋدى كوزدەيتىن ۇلكەن ناۋقان باستالدى. اسىرەسە وتىنمەن جىليتىن، ءقاۋىپتى ايماقتا ورنالاسقان ۇيلەر ەرەكشە باقىلاۋعا الىندى. الماتى قالاسى تجد مەملەكەتتىك ءورت باقىلاۋ باسقارماسىنىڭ باسشىسى كونستانتين كانين وڭىرلىك كوممۋنيكاسيالار قىزمەتىندە وسىلاي دەپ مالىمدەدى.
15 تامىزدان باستاپ الماتى قالاسى توتەنشە جاعدايلار دەپارتامەنتى جىلۋ ماۋسىمىندا توتەنشە جاعدايدىڭ الدىن الۋدى كوزدەيتىن ءىس-شارالار جۇرگىزە باستادى. ءقازىر 151 مىڭنان استام جەكە تۇرعىن ءۇي ەسەپتە تۇر. قاتتى وتىنمەن جىليتىن 1 450 ءۇي مەن ورتەنۋگە ەڭ بەيىم 5 605 ءۇيدى باقىلاۋعا العان.
حالىقتى قۇلاقتاندىرىپ، وقىس جاعدايدىڭ الدىن الۋ ءۇشىن ناسيحاتتاۋ مەن تۇسىندىرمە جۇمىسى دا قوسا قولعا الىندى. الەۋمەتتىك وسال توپتاعىلار تۇراتىن 686 ءۇي مەن وعاش قىلىقتى ادامدار تۇراتىن 2067 ءۇي وسىنداعى ەڭ ءقاۋىپتى ساناتقا كىرەدى. «ءقاۋىپسىز پەش»، «تازا ءتۇتىن» مەن «كومەك قولى» دەپ اتالاتىن اكسيالاردىڭ اياسىندا وسىلاردىڭ بارلىعى تەكسەرۋدەن ءوتتى.
25 قىركۇيەكتەن باستاپ ءورت قاۋىپسىزدىگى ايلىعى دا باستالادى. وسى ۋاقىت ىشىندە جەكە سەكتورداعى جانە كوپقاباتتى ۇيلەردەگى تۇرعىندارمەن كەزدەسىپ، ۇيلەردى ارالاپ شىقپاقپىز. تجد قىزمەتكەرلەرى تۇرعىندارعا ءورت قاۋىپسىزدىگىنىڭ تالاپتارىن تۇسىندىرەدى. تۇرعىندارعا جىلىتۋ قۇرىلعىلارىن ءقاۋىپسىز پايدالانۋعا قاتىستى نۇسقاۋلىقتار مەن بۋكلەتتەر تاراتىلادى.
بۇل جۇمىس «قىزىل اي قوعامى»، «Lider.kz» مەن «قازاقستان ەرىكتىلەر ليگاسى» سياقتى ۇيىمدار مەن «قازترانسگاز ايماق» اق وندىرىستىك بولىمشەسىمەن بىرلەسىپ جۇزەگە اسىپ وتىر. گاز قازاندىعىن قولداناتىن ۇيلەرگە ەرەكشە نازار اۋدارماق.
حالىقتىڭ كەڭىنەن حاباردار بولۋى ءۇشىن دەپارتامەنت ءورت قاۋىپسىزدىگى ەرەجەلەرى تۋرالى ەسكە سالۋ سمس-حابارلامالارىن ۇيىمداستىرىپ، 7،6 ميلليوننان استام ابونەنت حابارلاما الدى.
ينتەرنەتتە، ونىڭ ىشىندە الەۋمەتتىك جەلىلەردە 260 پروفيلاكتيكالىق ماتەريال جارىق كوردى. حالىق كوپ جينالاتىن نىسانداردا جىلۋ قۇرىلعىلارىن ءقاۋىپسىز پايدالانۋدى ناسيحاتتاۋ جاعى دا ەسكەرىلگەن.
«جىلىتۋ ماۋسىمى كەزىندە ءتۇتىن شىعاراتىن قوندىرعىنى كەمىندە ەكى ايدا ءبىر رەت تازالاپ تۇرۋ كەرەك. پەشتى شامادان تىس قىزدىرماڭىز، ولاردى تەز تۇتاناتىن، لاپ ەتە قالاتىن زاتقا جاقىن ورنالاستىرماڭىز. گازبەن جۇمىس ىستەيتىن پەشتى پايدالانۋدىڭ نۇسقاۋلىعىن قاتاڭ ساقتاڭىز. پەشتى، گاز كولونكاسىن، اس ءۇي پليتاسىن، كەروگاز بەن ەلەكتر قۇرىلعىلارىن بالالاردان اۋلاقتاۋ ۇستاپ، قاراۋسىز قالدىرماڭىز»، — دەپ قورىتتى كونستانتين كانين.