ەكى جەكە مەنشىك سۋبۇرقاقتىڭ يەسى ولاردى الماتىنىڭ كوممۋنالدىق مەنشىگىنە بەرۋگە دايىن، دەپ حابارلايدى almaty-akshamy.kz
26 ماۋسىمدا باستالعان «الماتى جازى» قالالىق اكسياسى اياسىندا مەگاپوليستە قالالىق سۋبۇرقاقتار تازارتىلىپ، جۋىلىپ، جاڭارتىلىپ جاتىر.
ءقازىر كوممۋنالدىق مەنشىكتىڭ بالانسىنداعى 66 سۋبۇرقاقتىڭ 60-ى رەتكە كەلتىرىلدى، قالعان 6-ى جاڭعىرتىلۋدا. جەكە اۋماقتا ورنالاسقان سۋبۇرقاقتار دا تازارتىلدى. ەلەكتر اسپاپتارىنىڭ، جارىقتاندىرۋدىڭ، قوندىرمالار مەن بۇرىككىشتەردىڭ جۇمىسى بويىنشا سۋبۇرقاق جابدىعىنا تەكسەرۋ جۇرگىزىلەدى.
سونىمەن قاتار، زاماناۋي جاياۋ جۇرگىنشىلەرگە ارنالعان سۋبۇرقاقتاردى كۇتىپ-باپتاۋ جۇمىستارى جۇرگىزىلۋدە، ونىڭ 13ء-ى قالانىڭ كوممۋنالدىق مەنشىگىندە. ولار قالپىنا كەلتىرىلىپ، فۋنكسيونالدىلىق ساقتالىپ، ەستەتيكا جاقسارتىلادى.
«اۋداندىق اكىمدىكتەر مەن «Eco Almaty» ج ش س جۇرگىزەتىن ءتۇسىندىرۋ جۇمىستارى اياسىندا جەكە سۋبۇرقاقتارعا ءتيىستى جاعدايدا تۇراقتى تەحنيكالىق قىزمەت كورسەتۋ جانە كۇتىپ ۇستاۋ قاجەتتىلىگى تۋرالى ماسەلەلەر بەلسەندى تالقىلانۋدا. جەكە سۋبۇرقاقتاردى كوممۋنالدىق مەنشىككە بەرۋ مۇمكىندىگىنە ەرەكشە نازار اۋدارىلادى. بۇل ولاردىڭ تۇراقتى جۇمىس ىستەۋىن جانە قالالىق ورتانى جاقسارتۋدى قامتاماسىز ەتۋگە مۇمكىندىك بەرەدى»، - دەدى «Eco Almaty» ج ش س وكىلى جانىبەك كەنجالييەۆ.
كوبىنەسە جەكە اۋماقتا ورنالاسقان سۋبۇرقاقتاردىڭ جاعدايى ءماز ەمەس، قاراۋسىز قالعان، جۇمىس ىستەمەيدى نەمەسە يەسىندە قاراجاتتىڭ بولماۋىنا بايلانىستى كۇردەلى جوندەۋدى قاجەت ەتەدى. جۇرگىزىلگەن ءتۇسىندىرۋ جۇمىستارىنىڭ ناتيجەسى بويىنشا ەكى جەكە سۋبۇرقاقتىڭ يەسى – «شاكەن ايمانوۆ اتىنداعى «قازاقفيلم» ۇلتتىق كينوستۋدياسى» اق جانە «ستوليچنىي» تۇك نىساندارىن كوممۋنالدىق مەنشىككە بەرۋگە دايىن ەكەندىكتەرىن ءبىلدىردى.
الماتىدا بارلىعى 150 سۋبۇرقاق بار، ونىڭ ىشىندە 66-ى كوممۋنالدىق جانە 84ء-ى جەكە اۋماقتا ورنالاسقان. «الماتى جازى» ناۋقانى اياسىندا جەكە سۋبۇرقاقتار قالالىق نىساندارمەن قاتار رەتكە كەلتىرىلەدى.
6 شىلدەدە اياقتالاتىن «الماتى جازى» ناۋقانى «تازا قازاقستان» جالپى رەسپۋبليكالىق اكسياسى اياسىندا ىسكە اسىرىلاتىن «الماتى – ءبىزدىڭ ورتاق ءۇيىمىز» ناۋقانىنىڭ جالعاسى بولىپ تابىلادى. ول قالالىق ينفراقۇرىلىم مەن قوعامدىق مۇلىككە ۇقىپتى قاراۋدى قالىپتاستىرۋعا، سونداي-اق ەل اراسىندا ەكولوگيالىق مادەنيەتتى ارتتىرۋعا باعىتتالعان.