الماتىدا جاستار دەنساۋلىعى ورتالىعىنان كەڭەس سۇراعاندار كوبەيىپ، ايەل ادامداردى ءارتۇرلى باعدارلاماعا تارتۋ جاعى ەسەلەپ وسكەن، دەپ حابارلايدى aqshamnews.kz
الماتىنىڭ دەنساۋلىق ساقتاۋ باسقارماسىنىڭ انا مەن بالا دەنساۋلىعىن قورعاۋ ءبولىمىنىڭ باسشىسى جادىرا احمەتوۆا وڭىرلىك كوممۋنيكاسيالار قىزمەتىندە وتكەن كوفەرەنسياسىندا وسىلاي دەپ حابارلادى.
«رەپرودۋكتيۆتى دەنساۋلىقتى قورعاۋ – الماتىنىڭ الەۋمەتتىك ساياساتىنداعى ەڭ ماڭىزدى سالا. 2025 جىلعى ءبىرىنشى توقسانداعى مالىمەتكە قاراعاندا، وتباسىن جوسپارلاۋ، دارىگەرگە قارالۋ مەن جاستارمەن جۇمىس ىستەۋ ماسەلەسىندە ۇلكەن ىلگەرىلەۋ بارى بايقالدى»، - دەدى جادىرا احمەتوۆا.
سپيكەردىڭ اقپاراتىنا قاراعاندا، 2025 جىلدىڭ 1 ساۋىرىندە الماتى تۇرعىندارىنىڭ سانى 2 348 096 ادامعا جەتكەن. بۇل 2023 جىلعى سول ۋاقىتپەن سالىستىرعاندا 5،6%، 2024 جىلعىمەن سالىستىرعاندا 2،5% كوپ. بالالاردىڭ سانى 2،5%، جاسوسپىرىمدەر جاعى 18%-عا وسكەن.
ايەل ازاماتتاردى انا اتانۋعا دايارلاۋ جاعىنا دا كوپ كوڭىل ءبولىنىپ جاتىر. بوسانۋعا ازىرلىك جاعى 2024 جىلعىمەن سالىستىرعاندا 19،1%-دان بيىل (جوسپار – 48%) 50 %-عا وسكەن. بۇل ايەلدەردىڭ دارىگەرلىك تۇرعىدا ساۋاتى ارتىپ، پروفيلاكتيكالىق ءى-شارالاردىڭ ناتيجە بەرە باستاعانىن كورسەتەدى.
«پرەگراۆيدارلىق دايىندىقپەن قامتۋدىڭ ارتۋى – انالار مەن بالالاردىڭ دەنساۋلىعىنا تونەتىن قاۋىپ-قاتەرى ازايتۋعا سەپتىگى تيەتىن ماڭىزدى قادام. كورسەتكىشتىڭ 2024 جىلمەن سالىستىرعاندا 19،1%-دان 50،8%-عا دەيىن ءوسۋى جاڭا تاسىلدەردىڭ ساتىمەن ەنگىزىلىپ، مەديسينالىق قىزمەت كورسەتۋدى ۇيىمداستىرۋدىڭ جاقسارىپ، ايەلدەردىڭ اقپاراتتانۋ دەڭگەيىنىڭ ارتقانىن دالەلدەيدى»، - دەدى جادىرا احمەتوۆا.
سونداي-اق، الماتىدا جاستار دەنساۋلىق ورتالىقتارى (جدو) - جاسوسپىرىمدەر مەن جاستار كەشەندى مەديسينالىق-پسيحوالەۋمەتتىك قولداۋ الاتىن مامانداندىرىلعان مەكەمەلەردىڭ جۇمىسى دا جاندانىپ جاتىر. قالادا ءقازىر وسىنداي 14 ورتالىق جۇمىس ىستەيدى. 2025 جىلدىڭ ءبىرىنشى توقسانىنىڭ قورىتىندىسى بويىنشا ورتالىقتارعا 25 مىڭنان استام ادام جۇگىنگەن، بۇل وتكەن جىلدىڭ وسى ۋاقىتپەن سالىستىرعاندا 66%-عا ارتىق.
سونىمەن قاتار، كومەك الاتىندار كوبىنە پسيحولوگتارعا (8627 رەت)، تەراپيەۆتەرگە (6063)، گينەكولوگتار (5745) مەن ۋرولوگتارعا (2225) قارالعان.
ورتالىقتاردا ءقازىر 98 مامان جۇمىس ىستەيدى، ولاردىڭ 60%-نىڭ رەپرودۋكتيۆتى جانە پسيحيكالىق دەنساۋلىق ماسەلەلەرى بويىنشا ارناۋلى سەرتيفيكاتى بار. بۇل دەنساۋلىق ساقتاۋ مينيسترلىگى بەكىتكەن ستاندارتتارعا تولىق سايكەسەدى.
«الماتىدا رەپرودۋكتيۆتى دەنساۋلىقتى قورعاۋعا باعىتتالعان باستامالار مەديسينالىق كومەكتى عانا ەمەس، سونىمەن بىرگە ءبىلىم بەرۋ، اعارتۋ مەن پسيحوالەۋمەتتىك سالانى دا قامتىعان. مۇنداي قادامدار حالىق دەنساۋلىعىن نىعايتۋعا، اتا-انا مادەنيەتىن قالىپتاستىرىپ، قالا تۇرعىندارىنىڭ ءومىر ساپاسىن ارتتىرۋعا ىقپال ەتەدى»، - دەپ تۇيىندەدى سپيكەر.