الماتى قالاسىندا "تازا قازاقستان" جالپىۇلتتىق اكسياسى اياسىندا وتكەن اۋقىمدى سەنبىلىككە قالامىزدىڭ 1500-دەن استام جاستارى قاتىستى.
ولاردىڭ قاتارىندا قوعام بەلسەندىلەرى، ستۋدەنتتەر جانە الماتىداعى بارلىق كوميۋنيتي ورتالىقتاردىڭ رەزيدەنتتەرى بولدى. بۇل ءىس-شارا تەك قالانى تازالاۋمەن شەكتەلمەي، جاستاردىڭ بىرلىگىن كورسەتكەن ماڭىزدى شارا بولدى، دەپ حابارلايدى aqshamnews.kz.
الماتى جاستارى ەكولوگيالىق باستامالارعا بەلسەنە قاتىسىپ، قورشاعان ورتانى قورعاۋداعى ءرولىن كورسەتىپ كەلەدى. سەنبىلىك بارىسىندا ولار قالانىڭ ساياباق ايماقتارىن جيناستىرىپ، جاڭا اعاشتار وتىرعىزدى. بۇل تەك ەكولوگيانى جاقسارتۋعا عانا ەمەس، سونىمەن قاتار بولاشاق ءۇشىن جاستاردىڭ بىرىگۋىنىڭ سيمۆولىنا اينالدى.
«ءبىز قالامىزدى جاسىل ءارى تازا ەتۋ ءۇشىن بىرىگىپ جۇمىس ىستەگەندە، تەك قانا اعاش وتىرعىزىپ نەمەسە تازالىق جۇمىستارىن جاسامايمىز. ءبىز الماتى جاستارى ناقتى ىستەرگە دايىن ەكەنىن كورسەتەمىز. بۇل — بولاشاعىمىزعا قوسقان ۇلەس. ءارقايسىمىز قورشاعان ورتاعا جاۋاپكەرشىلىكپەن قاراۋىمىز كەرەك»، - دەدى ءوز سوزىندە كوميۋنيتي ورتالىقتارىنىڭ رەزيدەنتى كەمەلبەكوۆ مۇحامەدجان.
ءاربىر قاتىسۋشى تۋعان قالاعا دەگەن قامقورلىق — بۇل ورتاق ءىس ەكەنىن كورسەتتى. الماتى جاستارى مۇنىمەن توقتاپ قالماي، الداعى ۋاقىتتا دا قالانى تازارتۋعا باعىتتالعان شارالارعا قاتىساتىندارى تۋرالى ايتتى.
ايتا كەتەيىك، الماتىدا «تازا قازاقستان» رەسپۋبليكالىق باعدارلاماسى مەن «الماتى – ءبىزدىڭ ورتاق ءۇيىمىز» قالالىق ناۋقانى اياسىندا 18-24 قازان ارالىعىندا حالىق اراسىندا ەكولوگيالىق مادەنيەتتى قالىپتاستىرۋعا، قالانى كورىكتەندىرۋ مەن كوگالداندىرۋعا باعىتتالعان «جارقىن كۇز» اكسياسى ءوتىپ جاتىر.