سوڭعى نۇسقا رەسمي بەكىتىلدى
سوڭعى نۇسقا جۇرتتىڭ تالقىلاۋىنان ءوتىپ، زاڭنامادا بەلگىلىنگەن تارتىپپەن رەسمي بەكىتىلىپ وتىر، دەپ حابارلايدى Almaty-akshamy.kz Almaty.tv-گە سىلتەمە جاساپ.
ساياباقتا سالىناتىن نىساندار بۇگىن بەلسەندى ازاماتتارعا دا ەگجەي-تەگجەيلى ءتۇسىندىرىلدى. وقۋشىلار سارايىنىڭ الاڭىندا اتقارىلار جۇمىستىڭ ۇلگىسى تانىستىرىلىپ، جينالعاندار ناقتى مالىمەت الدى. ماسەلەن، جاڭا جوباعا سايكەس، اتالعان اۋماقتا 192 كوشە شامى مەن 21 جارىقشامدى اۋىستىرۋ جوسپارلانسا، ودان بولەك 5442 كوشەت وتىرعىزۋ دا كوزدەلگەن. اتقارىلار جۇمىستىڭ قاتارىندا 71 ورىندىق پەن 64 قوقىس جاشىگىن ورناتۋ دا بار.
«بۇگىن ءبارىمىزدىڭ جينالۋىمىزعا ءبىر عانا سەبەپ بار. ول – ساياباقتىڭ تاريحي كەلبەتىن ساقتاۋدى تالاپ ەتۋ. ارينە، بۇگىن ءبىز تانىسقان جۇمىستىڭ جوباسى بۇرىنعىسىنان بولەك ەكەنىن كوردىك. ەگەر تۇرعىندارعا قولايلى جاعداي جاسالسا، نەگە قولداماسقا»، – دەدى بەلسەندى تيمۋر ەلەۋسىزوۆ.
3 جىل بۇرىن كوپشىلىكتىڭ نازارىنا ۇسىنىلعان جوباعا بۇل جولى ءبىرشاما وزگەرتۋ ەنگىزىلگەن. سوڭعى نۇسقا جۇرتتىڭ تالقىلاۋىنان ءوتىپ، زاڭنامادا بەلگىلىنگەن تارتىپپەن رەسمي بەكىتىلىپ وتىر. ال كوپتى تولعانتقان گرانيت جيەكتاستارى ەسكەرتكىشتەردىڭ ماڭى مەن ورتالىق اللەياعا قايتا ورناتىلادى.
«قوعامدىق كەڭەستىڭ شەشىمىمەن ارنايى مونيتورينگتىك توپ جۇمىس ىستەيدى. سول ارقىلى اپتا سايىن مۇنداعى اتقارىلىپ جاتقان ءىستىڭ جاي-كۇيىمەن تانىسىپ وتىرامىز. ارينە، جۇمىستى قاداعالايتىن نەگىزگى ماماندار بار. سونداي-اق قالا تۇرعىندارىنىڭ دا حاباردار بولىپ وتىرۋىنا جاعداي جاسالعان»، – دەدى قوعامدىق كەڭەستىڭ ءتورايىمى التىناي كوبەيەۆا.