الماتىدا قالا اكىمى ەربولات دوسايەۆتىڭ باستاماسىمەن «الماتى جاستارى» تۇرعىن ءۇي باعدارلاماسىن قارجىلاندىرۋ جالعاستىرىلادى.
بۇل تۋرالى الماتى قالاسى ءماسليحاتىنىڭ كەزەكتەن تىس سەسسياسى بارىسىندا قارجى باسقارماسىنىڭ باسشىسى قانات سۋحامبەكوۆ مالىمدەدى، دەپ حابارلايدى aqshamnews.kz.
الماتى قالاسىنىڭ بيۋدجەتىن ناقتىلاۋ شەڭبەرىندە حالىقتىڭ الەۋمەتتىك وسال توپتارى ساناتىنداعى ازاماتتار ءۇشىن الەۋمەتتىك كومەك كولەمى ۇلعايتىلدى: 585 ملن تەڭگە اۋداندىق اكىمدىكتەرگە ازاماتتارعا ۇيدە الەۋمەتتىك قولداۋ كورسەتۋگە، سونداي-اق ەرەكشە قاجەتتىلىكتەرى بار ادامداردى قولداۋعا بولىنەدى.
قانات سۋحامبەكوۆ اتاپ وتكەندەي، «الماتى جاستارى» تۇرعىن ءۇي باعدارلاماسىن قارجىلاندىرۋ ءۇشىن بيۋدجەتتەن قوسىمشا 1،4 ملرد تەڭگە بولىنەدى.
بۇل، ونىڭ ايتۋىنشا، الەۋمەتتىك، قۇقىق قورعاۋ، كوممۋنالدىق جانە باسقا دا سالالاردا ەڭبەك ەتەتىن جاس ازاماتتار ءۇشىن قوسىمشا 80 يپوتەكالىق قارىز بەرۋگە مۇمكىندىك بەرەدى.
سونداي-اق، تۇرعىن ءۇي جاعدايىن جاقسارتۋ ءۇشىن ىشكى ىستەر ورگاندارىنىڭ 2 510 قىزمەتكەرىنە جەرگىلىكتى بيۋدجەتتەن قوسىمشا 2،5 ملرد تەڭگە ءبولۋ جوسپارلانۋدا.