الماتى قالاسىنداعى جاستاردى تۇرعىن ۇيمەن قامتاماسىز ەتۋ ماقساتىندا جۇزەگە اسىرىلىپ كەلە جاتقان «الماتى جاستارى» باعدارلاماسى كوپتەگەن جاس ماماندار ءۇشىن ۇلكەن مۇمكىندىككە اينالدى. بۇگىندە وسى باعدارلاما ارقىلى قالا جاستارى جەڭىلدەتىلگەن نەسيە الىپ، ءوز باسپاناسىنا قول جەتكىزىپ جاتىر.
سولاردىڭ ءبىرى – مادينا ماناپ قىزى. الماتى ەلەكترومەحانيكا كوللەدجىندە 2015 جىلدان قىزمەت اتقاراتىن جاس مامان 2019 جىلى قازان-قاراشا ايلارىندا «الماتى جاستارى» باعدارلاماسىنا قۇجاتتارىن وتكىزەدى. «ب ا ق شابا ما، باپ شابا ما» دەمەكشى، جۇبايى ەكەۋى قول ۇستاسىپ ءجۇرىپ جيناقتاعان قۇجاتتارى كونكۋرستان ءوتىپ، 2020 جىلى مامىر ايىندا جالدامالى پاتەرگە قول جەتكىزەدى. مەملەكەتتىڭ شاپاعاتىن كورگەن جاس وتباسى جاقىندا ءوز ۇيلەرىنە كوشىپ، قونىس تويىن تويلاۋعا دايىندىق ۇستىندە.
– ول كەزدە ءبىز ەكىنشى ءسابيىمىزدى كۇتىپ جۇرگەن ەدىك. ءدال سول ۋاقىتتا تۇرعىن ۇيگە ارنالعان كونكۋرستىڭ ەكىنشى كەزەڭى ءوتىپ جاتقان بولاتىن. باقىتىمىزعا وراي، 104 ادامنىڭ ىشىنەن 102ء-شى بولىپ جالدامالى پاتەردىڭ كىلتىنە يە بولدىق. وسىلايشا، 2020 جىلدىڭ ماۋسىم ايىندا كوپتەن كۇتكەن ارمانداعان باسپانامىزعا قونىستاندىق. بىزگە بۇيىرعان ەكى بولمەلى، 66 شارشى مەترلىك پاتەردە بەس جىل بويى تۇردىق. باعدارلاماعا 35 جاسقا دەيىنگى ازاماتتار قاتىسا الاتىن ەدى، ال ءبىز جاس شەكتەۋىنە سايكەس كەلىپ، بۇل مۇمكىندىكتى جىبەرمەدىك. وسى ۋاقىت ارالىعىندا مەن ءۇش جىلداي بالا كۇتىمىمەن ۇيدە وتىردىم. ەڭ باستىسى، جالدامالى پاتەرگە ايىنا نەبارى 12 مىڭ تەڭگە عانا تولەپ وتىردىق. بۇل بىزگە ءوز ارمانىمىزدى جۇزەگە اسىرۋعا، ياعني جەكە باسپانامىزدى الۋ ءۇشىن قاراجات جيناۋعا ۇلكەن مۇمكىندىك بەردى. وسى ۋاقىت ارالىعىندا جوسپارلى تۇردە 1 800 000 تەڭگە باستاپقى جارنانى جيناپ، 2024 جىلدىڭ قازان ايىندا «الماتى جاستارى» باعدارلاماسى ارقىلى جەڭىلدەتىلگەن نەسيەمەن ءوز ءۇيىمىزدى ساتىپ الدىق. ءقازىر جوندەۋ جۇمىستارىن جۇرگىزىپ جاتىرمىز، كوپ ۇزاماي قونىس تويىن تويلايمىز. جاستارعا كەرەمەت مۇمكىندىكتى ۇسىنعان مەملەكەتكە، قالا بيلىگىنە العىسىمىز شەكسىز! – دەيدى جاس مامان.
بيىل 6000 استام الماتىلىق باسپانالى بولادى. بۇعان مەملەكەتتىك 2% جانە 5% يپوتەكالىق باعدارلامالارىنىڭ، قالالىق «الماتى جاستارى» قاتىسۋشىلارى مەن كەزەكتە تۇرعان الەۋمەتتىك وسال توپ ساناتىنداعىلار قول جەتكىزەدى.
بۇگىندە قالا بويىنشا باسپانا كەزەگىندە 40 مىڭنان استام ادام كەزەكتە تۇر. حالىقتىڭ الەۋمەتتىك وسال توپتارىن تۇرعىن ۇيمەن قامتاماسىز ەتۋ ماقساتىندا مەملەكەت تاراپىنان ءبىرقاتار جەڭىلدەتىلگەن يپوتەكالىق باعدارلامالار ۇسىنىلعان. سولاردىڭ قاتارىندا «باقىتتى وتباسى» مەن «شاڭىراق» بار. بۇل باعدارلامالار اياسىندا قارىز الۋشىلار ءۇشىن نەسيە مولشەرلەمەسى 2% جانە 5% پايىز دەڭگەيدە بەلگىلەنگەن. ال جاستارعا ارنالعان «الماتى جاستارى» بويىنشا بۇل كورسەتكىش – 5%-دى قۇرايدى.
ايتا كەتۋ كەرەك، وتكەن جىلدان باستاپ ءوتىنىش بەرۋشىلەردەن تولەم قابىلەتتىلىگىن راستاۋ جانە كەمىندە 10% باستاپقى جارنا تولەۋ تالاپ ەتىلدى. بۇدان بولەك، مەملەكەتتىك باعدارلامالار باستاپقى جارنانىڭ ءبىر بولىگىن وتەۋگە مۇمكىندىك بەرەتىن تۇرعىن ءۇي سەرتيفيكاتتارىن بەرۋدى قاراستىرۋدا.
كوممۋنالدىق ينفراقۇرىلىمدى دامىتۋ باسقارماسى باسشىسىنىڭ ورىنباسارى عالىمجان ابدىشۇكىر ۇلىنىڭ ايتۋىنشا، كەزەكتە تۇرعان ازاماتتار ەگەر كەزەگىن كۇتكىسى كەلمەسە، «شاڭىراق» جانە «باقىتتى وتباسى» باعدارلامالارى ارقىلى 2 جانە 5%-دىق جەڭىلدىكپەن ءۇي الۋلارىنا بولادى. 2%-بەن «باقىتتى وتباسى» دەگەن بارعدارلاما بار. وعان كوپبالالى وتباسىلار، 1 جانە 2 توپتاعى مۇگەدەكتەر، مۇگەدەك بالا اسىراۋشىلار جانە جەتىم بالالار كەزەكتە تۇر. وسى ءتورت سانات بويىنشا كەزەككە تۇرعان ازاماتتار كەزەگىن كۇتكىسى كەلمەسە، وسى يپوتەكالىق باعدارلاما ارقىلى باسپانالى بولسا بولادى. وندا باستاپقى جارنانى وتەۋ ءۇشىن 1،5 ملن تەڭگەگە دەيىن اكىمشىلىك تاراپىنان قاراجات قاراستىرىلعان.
وتكەن جىلى «الماتى جاستارى» باعدارلاماسىنا «جۇمىس ىستەيتىن جاستار» ساناتى ەنگىزىلىپ، 20 ادام جالدامالى پاتەردىڭ كىلتىن الدى. ال بيىل قالا بيلىگى جىل سوڭىنا دەيىن 6 مىڭنان استام الماتىلىقتاردى تۇرعىن ۇيمەن قامتاماسىز ەتۋدى جوسپارلاپ وتىر.