كەڭەس اسكەرىنىڭ شەكتەۋلى كونتينگەنتىن اۋعانستاننان شىعارۋ كۇنىنە ارنالعان ايلىق اياسىندا №36 قالالىق ەمحانادا اۋعان سوعىسى ارداگەرلەرى ءۇشىن ءبىرقاتار ءىس-شارا ءوتتى.
ەمحانا دارىگەرلەرى مەن ماماندارى سوعىسقا قاتىسۋشىلاردىڭ دەنساۋلىعى مەن پسيحولوگيالىق جاعدايىنا ەرەكشە نازار اۋداردى، دەپ حابارلايدى aqshamnews.kz.
ماڭىزدى شارانىڭ ءبىرى - پسيحولوگ پەن الەۋمەتتىك قىزمەتكەرلەردىڭ قاتىسۋىمەن وتكەن پسيحولوگيالىق ترەنينگ بولدى. شاراعا قاتىسۋشىلار قاجەتتى قولداۋ الىپ، بەيىمدەلۋ، سترەسكە توزىمدىك جانە پسيحيكالىق دەنساۋلىققا قاتىستى ماڭىزدى ماسەلەنى تالقىلادى. كەزدەسۋ جىلى ءارى سەنىمدى اتموسفەرادا ءوتتى.
سونىمەن قاتار ەمحانادا اشىق ەسىك كۇنى ۇيىمداستىرىلدى. بۇل كۇنى ارداگەرلەر كەشەندى مەديسينالىق تەكسەرۋدەن ءوتتى. قابىلداۋدى تار بەيىندى ماماندار - كارديولوگ، ۋرولوگ، وفتالمولوگ، نيەۆروپاتولوگ جانە ەندوكرينولوگ جۇرگىزدى. دارىگەرلەر تەك دياگنوستيكا جاساپ قانا قويماي، بارلىق سۇراققا تولىق جاۋاپ بەردى.
تەكسەرۋ ناتيجەسى بويىنشا ارداگەرلەرگە قوسىمشا ەكگ، مرت، ۋدز جانە باسقا دا قاجەتتى دياگنوستيكالىق زەرتتەۋگە جولداما بەرىلدى. بۇل ولاردىڭ دەنساۋلىق جاعدايىن تولىق باعالاپ، دەر كەزىندە ەم تاعايىنداۋعا مۇمكىندىك بەردى.
№36 قالالىق ەمحانا ارداگەرلەرگە جان-جاقتى مەديسينالىق جانە پسيحولوگيالىق قولداۋ كورسەتۋدى جالعاستىرىپ، ولاردىڭ تاريحتاعى ءرولىن مويىنداپ، دەنساۋلىعىنا قامقورلىق جاساۋدى باستى نازاردا ۇستايدى.