«الماتى جاستارى» باعدارلاماسى اياسىندا بەرىلەتىن پاتەردىڭ سانى ارتادى

2017 جىلدان باستاپ قالامىزدا «الماتى جاستارى» جەڭىلدەتىلگەن باعدارلاماسى جۇزەگە اسىپ جاتىر

بيىل «الماتى جاستارى» باعدارلاماسى بويىنشا 1100 پاتەر بەرىلەدى. بۇل تۋرالى وڭىرلىك كوممۋنيكاسيالار قىزمەتىندە وتكەن باسپا ءسوز ءماسليحاتىندا «وتباسى بانك» اق الماتى فيليالىنىڭ ديرەكتورى داناگۇل ءتۇسىپوۆا ءمالىم ەتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.

«2017 جىلدان باستاپ قالامىزدا «الماتى جاستارى» جەڭىلدەتىلگەن باعدارلاماسى جۇزەگە اسىپ جاتىر. ول بارلىق وڭىرلەردە ايماقتىق باعدارلامالاردىڭ ىسكە قوسىلۋىنا نەگىز بولدى. «ەلوردا جاستارى»، «الاتاۋ جاستارى» باعدارلامالارى بار. مۇندا ءار ايماقتا نەسيە بەرۋ شارتتارى ءارتۇرلى. ماسەلەن، «الماتى جاستارى» باعدارلاماسى اياسىندا ءبىلىم، دەنساۋلىق ساقتاۋ، مادەنيەت، ب ا ق، سپورت، عىلىمي-زەرتتەۋ ينستيتۋتتارى، قۇقىق قورعاۋ ورگاندارى سياقتى جەتى سالادا ەڭبەك ەتىپ جۇرگەن 35 جاسقا دەيىنگى جاستارعا نەسيە بەرىلەدى»، - دەدى سپيكەر.

داناگۇل ءتۇسىپوۆانىڭ ايتۋىنشا، بيىل باعدارلاماعا وزگەرىستەر ەنگىزىلمەك.

«ءقازىر اكىمدىكتىڭ ماقۇلداۋىن كۇتىپ وتىرمىز. باعدارلامانىڭ باستالعانىن كەيىن حابارلايمىز. ءبىز 1100 ازاماتقا نەسيە بەرۋدى جوسپارلاپ وتىرمىز. باعدارلاما شارتتارىنا كەلسەك، باستاپقى جارنا – 10 پايىز، مولشەرلەمە – 5 پايىز، نەسيە سوماسى بىلتىرعىداي 18 ملن تەڭگە بولۋى مۇمكىن»، – دەپ ءتۇسىندىردى سپيكەر.

ەسكە سالايىق، 2022 جىلى «الماتى جاستارى» تۇرعىن ءۇي باعدارلاماسى اياسىندا مىڭ ادامعا يپوتەكالىق نەسيە بەرۋ ءۇشىن 18 ملرد تەڭگە بولىنگەن بولاتىن.

ايتا كەتەيىك، «الماتى جاستارى» باعدارلاماسىنا قاتىسۋ ءۇشىن قالادا تۇراقتى تىركەلۋ مىندەتتى ەمەس.