15 جاسار زارا داركەن العاش رەت ەرەسەكتەر اراسىنداعى حالىقارالىق تۋرنيرگە جولداما الدى.
قازاقستان تەننيس فەدەراسياسىنان ءمالىم ەتكەنىندەي، ز.داركەن ITF جانە WTA رەيتينگىسىنە كىرمەسە دە، يتاليانىڭ سولارينو قالاسىندا ITF World Tennis Tour W15 سەرياسى بويىنشا ءوتىپ جاتقان دودانىڭ ىرىكتەۋ سايىستارىن ءساتتى وتكىزدى، دەپ حابارلايدى Almaty-akshamy.kz قازاقپاراتقا سىلتەمە جاساپ.
زارا ىرىكتەۋ سايىستارىنىڭ العاشقى اينالىمىندا يتاليالىق دجوردجي ءپاتتيدى 6:1، 6:2 ەسەبىمەن تىزە بۇكتىردى. ال ىرىكتەۋ سايىستارىنىڭ فينالىندا تاعى ءبىر كورت يەسى كاميللا لەرۆولينونى 6:1، 6:4 ەسەبىمەن جولدان تايدىردى.
نەگىزگى جارىستا اقتوبە تەننيس مەكتەبىنىڭ تۇلەگى دۇنيەجۇزىلىك رەيتينگتە 1236-ورىندا تۇرعان 25 جاستاعى ۇلىبريتانيالىق ابيگەيل اموسپەن شەبەرلىك بايقاسادى.